MHE MGUMBA AKERWA KUTOKAMILIKA MIRADI YA UMWAGILIAJI

NAIBU wa waziri wa Kilimo Omary Mgumba amesikitishwa na kutotekelezwa katika kiwango kinachotakiwa Mradi wa umwagiliaji wa  Tulo Kongwa katika halmashauri ya Wilaya ya Morogoro licha ya serikali kuwekeza fedha nyingi katika Maradi huo.

Mgumba ametoa kauli hiyo wakati wa ziara yake ya kukagua miradi ya umwagiliaji, kuhamasisha kilimo  cha Pamba pamoja umuhimu wa Kujiunga katika vyama vya ushirika katika wilaya ya Morogoro.

Katika ziara hiyo Naibu waziri wa Kilimo aliambatana na Mkurugenzi Mkuu bodi ya Pamba, Marco Mtunga na mrajisi wa  vyama vya ushirika Tito Haule pamoja na viongozi wengine wa Mkoa wa Morogoro.

Mgumba amesema kuwa licha ya mradi huo kugharimu fedha nyingi za serikali lakini usimamizi wake ulikuwa mbovu kwa baadhi ya viongozi  hali iliyofanya kutekelezwa chini kiwango.

Hata hivyo naibu waziri Omary Mgumba amesema kuwa Mradi wa Umwagiliaji  Tulo Kongwa utatumika katika zaidi ya hekta 5,000.

Pia amewataka wananchi wanufaikka na Mradi huo kujikita katika kilimo cha kisasa ili kuweza kuvuna mavuno yenye tija kwa maendeleo ya taifa naya kwao binafsi,kwa kuzingatia kanuni bora za kilimo.

Awali wananchi hao katika risala ya katibu wa umoja wa wakulima wa umwagiliaji wa Tulo/Kongwa walimueleza naibu waziri wa Kilimo kuwa toka kuanza kwa kilimo cha umwagilijo wameweza kuongeza uzalishaji kutoka gunia 3 kwa heka 1 hadi kufikia gunia 20.

Aidha wameiomba serikaliya Halmashuri hiyo kwa kushirikiana na TARURA kutengeneza barabara ili kuwawezesha kusafirisha mazao yao vizuri sambamba na kupelekewa huduma ya umeme ili kuweza kuunguza mchele badala ya Mpunga kama wanavyofanya hivi sasa.

Awali akiwa katika eneo la Matombo Naibu waziri wa Kilimo amewataka viongozi wa vyama vya ushirika kuwa na nidhamu katika matumizi ya fedha ilikuweza kujenga imani kwa wanachama wake.

Kwa upande wake Mkurugenzi Mkuu bodi ya Pamba,Marco Mtunga ametumia fursa hiyo kuwataka wakulima ndani ya Halmashauri ya Wilaya ya Morogoro kujikita katika kilimo cha Pamba kutokana na kuwa na faida kubwa huku pia likiwa ni zao lenye kuvumilia ukame.

Nae mrajisi wa  vyama vya ushirika Tito Haule  ameeleza kuwa vyama vya ushirika vina faida kubwa ikiwemo kumlinda mkulima kwa kumuepusha na walanguzi wa mazao ambao umekuwa ukipelekea mkulima kurudi nyuma kiuchumi.