Kwa Mara ya Kwanza Serikali yatenga Zaidi ya Tsh Bilioni 2.2 kwa Ajili ya Kuzalisha Mbegu Bora za Alizeti

Waziri wa Kilimo Mhe. Prof. Adolf Mkenda akihutubia wadau wa zao la Alizeti hivi leo Mkoa wa Dodoma katika hafla ya uzinduzi wa Mbegu za Alizeti mkoani Dodoma.(Picha zote na Innocent Natai)

Waziri wa Kilimo Mhe. Prof. Adolf Mkenda akimkabidhi mfuko wa Mbegu ya Alizeti Dkt.Fatma Mganga Katibu Tawala Mkoa wa Dodoma katika hafla ya uzinduzi wa Mbegu za Alizeti mkoani Dodoma.

Waziri wa Kilimo, Prof. Adolf Mkenda akimkabidhi mfuko wa Mbegu ya Alizeti, Mwenyekiti wa wakulima wa alizeti Ndg. Steven Maleale, baada ya uzinduzi wa mpango wa usambazaji wa mbegu ya alizeti.

Na Innocent Natai

Waziri wa Kilimo Mhe.Prof. Adolf Mkenda amezindua rasmi zoezi la Mpango wa usambazaji wa  Mbegu za Alizeti kwa wakulima, huku akiagiza Mbegu hizo kuuzwa kwa kilo moja TSH.3,500 kwa wakulima hii ni ili kutatua changamoto iliyokuwepo kwa wakulima wa zao hilo kukosa mbegu bora ambazo zilipelekea kukosa mazao ya kutosha

Akizungumza na wakulima, pamoja na wadau wa zao la Alizeti katika ofisi ndogo za Wizara ya Kilimo,Kilimo4 Mkoani Dodoma, Waziri Mkenda amesema, serikali imeweka mkakati kuhakikisha changamoto ya Mbegu inakwisha kwa miaka michache ijayo.

Amesema kwa Mara ya kwanza serikali imetenga zaidi ya Tsh Bilioni 2.2 kwa ajili ya kuzalisha mbegu bora za alizeti karibu tani 2,000.

Waziri amewataka wafanya Biashara kuwekeza katika kilimo Cha Alizeti hasa katika Uzalishaji wa Mbegu ili waweze kupata fedha kwa haraka kutokana na uwepo wa soko la uhakika.

Ameongeza kuwa, mahitaji ya Mbegu za Alizeti ni makubwa hapa Nchini ambapo kwa Sasa zimepatikana Tani 1,600 Hadi 2000 huku mahitaji halisi yakiwa ni Tani 5,000.

Kwa upande wake, Mkurugenzi Mkuu wa Wakala wa Mbegu za kilimo ASA Dkt. Sophia Kashenge amesema, Kama Taasisi inaendelea kufuata maelekezo ya wizara ya kilimo na kuhakikisha changamoto ya Mbegu inakwisha.

Amesema, Mbegu hizo zitauzwa kwa shilingi 3,500 kwa kilo moja Kama waziri wa Kilimo alivyo agiza huku akiwataka wakulima kununua Mbegu hizo kwa Bei nafuu kutoka kwa Wakala wa serikali.

Naye Katibu Tawala wa mkoa wa Dodoma Dkt. Fatuma Mganga amesema, Kama mkoa wamejipanga kuhakikisha Mbegu hiyo ya Alizeti inawafikia wakulima kupitia Halmashauri zao kwa bei iliyoelekezwa na serikali.

Amesema, kupitia wakuu wa wilaya na wakurugenzi wa Halmashauri hizo ufanisi wa kilimo Cha Alizeti katika maeneo yao ndio itakuwa kipimo Chao Cha kazi, kuongeza  kuwa hategemei Kama wilaya ama Halmashauri mojawapo itahindwa kufikia malengo.

Akimwakilisha Mkuu wa mkoa wa Dodoma Bi. Mwanahamisi Munkunda ambaye pia ni Mkuu wa Wilaya ya Bahi, amesema, maelekezo yote ya serikali yaliyotolewa juu ya Mbegu za Alizeti kwa wakulima yatafanyiwa kazi kulingana na umuhimu wake nakuongeza kuwa mkoa wa Dodoma Kama miongoni mwa mikoa ya kimkakati utafanya vizuri katika kilimo cha alizeti.

MWISHO