Yanga yachekelea ligi kusimama

BAADA ya Shirikisho la Soka Tanzania (TFF) kuusogeza mbele mchezo wa Ligi Kuu kati ya Yanga na JKT Ruvu kocha msaidizi wa mabingwa hao watetezi Juma Mwambusi amesema uamuzi huo umekuja wakati muafaka kwao kwani wachezaji wao watapata muda wa kupumzika.

Yanga ilipangwa kucheza mechi ya kiporo ya ligi dhidi ya JKT Ruvu leo Uwanja wa Taifa Dar es Salaam lakini TFF imesogeza mbele mchezo huo mpaka utakapopangwa tena tarehe nyingine.

Taarifa ya TFF ilisema moja ya sababu za kuahirisha mchezo huo ni kutokana na Yanga kuwa na wachezaji wengi kwenye kikosi cha timu ya taifa, Taifa Stars kinachotarajiwa kwenda Nigeria kesho kwa ajili ya mechi ya kuwania kufuzu michuano ya Kombe la Mataifa Afrika Septemba tatu.

Akizungumza na gazeti hili jana Mwambusi alisema hiyo ni nafasi nzuri kwao kwani wataitumia kufanya mazoezi mepesi mepesi ili kuwapa muda wa kupumzika wachezaji wao ambao kwa muda mrefu wamekuwa wakitumika tangu kumalizika kwa ligi ya msimu uliopita.

“Tunaishukuru TFF, kwa nafasi hii waliyotupa na sisi tutaitumia kwa kufanya mazoezi mepesi ili wachezaji wetu waweze kupumzika na miili yao iutamani mpira baada ya kufanya kazi mfululizo bila kupumzika lakini pia nafasi hii itatusaidia kurudi kwenye kasi yetu tuliyokuwa nayo msimu uliopita,” alisema Mwambusi.

Kocha huyo alisema mechi za michuano waliyokuwa wakishiriki zimewapa uchovu mkubwa kutokana na ugumu, lakini hawakuwa na la kufanya zaidi ya kufuata kile wanachotakiwa na TFF, ambao ndiyo waongozaji wa soka la Tanzania.

Tayari ligi imeanza kwa timu 16 kushuka dimbani mara mbili kila moja isipokuwa Yanga na JKT Ruvu ambazo zimecheza mchezo mmoja mmoja kutokana na ratiba ya Yanga ilivyokuwa.