Waziri wa
Madini Doto Biteko akikagua shughuli za uchimbaji madini katika eneo la Lusu,
wilayani Nzenga Mkoa wa Tabora.
Baadhi ya
wananchi wakiponda mawe yenye dhahabu katika moja ya mgodi wa wachimbaji
wadogo.
Baadhi ya
Wachimbaji wakimwangalia Waziri Biteko (hayupo pichani) wakati wa ziara yake katika
migodi ya Lusu Wilayani Nzega.
Baadhi ya
wachimbaji wakimsikiliza Waziri Biteko wakati akizungumza nao katika mkutano wa
hadhara baada ya kutembelea migodi.
Serikali
imesema Ushuru wowote unaotolewa kwenye Maeneo ya Migodi Nchini ni lazima
uthibitishwe na Maafisa Madini walioko kwenye maeneo husika.
Tamko hilo
lilitolewa Mei 24, 2020 na Waziri wa
Madini Doto Biteko wakati akizungumza na Wachimbaji Wadogo wa Madini ya
Dhahabu eneo la Lusu Wilayani Nzega Mkoa wa Tabora alipotembelea eneo
hilo kuangalia shughuli za uchimbaji madini.
Aidha,
tamko hilo linafuatia kuwepo kwa malalamiko toka kwa
wachimbaji wanaofanyakazi kwenye Leseni za baadhi ya Wachimbaji ambao
walimlalamikia Waziri Biteko kutozwa kodi na wenye leseni hizo na hivyo kuomba
ufafanuzi juu ya suala hilo.
Waziri
Biteko alisisitiza kwa kuwataka Maafisa hao kuhakikisha Ushuru unaotolewa
ni ule tu uliopo Kisheria na kuhakikisha wanasimamia jambo hilo.
Akifafanua
kuhusu suala la mrabaha wa mawe unaotozwa na Serikali alieleza
kuwa, wachimbaji wasio rasmi wanalazimika kulipia mrabaha wa mawe
isipokuwa wenye Leseni wanatakiwa kulipia mrabaha wa dhahabu baada ya
kukamilisha hatua zote.
" Wale
msio rasmi mjue mkigawana mawe na Serikali itakuwepo mnagawana nayo
isipokuwa mwenye Leseni yeye tutamwomba mrabaha wetu mwishoni. Ukitaka
kulipa mrabaha mara moja chimba kwenye Leseni, mkichimba bila utaratibu
tutagawana kwenye mawe na kwingine," alisisitiza Waziri Biteko.
Pia,
aliendelea kuwasisitiza wachimbaji nchini kuyatumia Masoko ya Madini
yaliyoanzishwa katika maeneo mbalimbali kufanya biashara ya madini.
Akijibu
ombi la wachimbaji hao kupelekewa Wataalam wa masuala ya Utafiti ili
kuwawezesha kujua mwelekeo wa miamba na hivyo kuchimba kwa tija, alisema
Wizara itaangalia namna ya kufikisha Mtambo wa Kuchoronga katika eneo
hilo baada ya Shirika la Madini la Taifa ( STAMICO) kukamilisha kazi za
kandarasi za uchorongaji zinazoendelea katika maeneo mengine.
Katika
hatua nyingine, alipongeza wachimbaji kwa kulipa mrabaha wa Serikali na hivyo
kuwezesha makusanyo ya shilingi Bilioni
2.7 hadi kufikia Aprili 30, sawa na
asilimia 122 na hivyo kuvuka lengo la
makusanyo ya shilingi bilioni 2.2 zilizopangwa kukusanywa Mwaka wa fedha
2019/2020.
Aidha,
aliongeza kuwa, baada ya serikali kutoa eneo hilo kwa wachimbaji wadogo, kwa kipindi cha kuanzia mwezi Desemba hadi sasa madini ya
dhahabu ya thamani ya shilingi Bilioni 3 na Milioni 500 yalizalishwa
katika eneo hilo la Lusu.
"
Watanzania changamkieni Rasilimali hii Ni zenu, chapeni kazi mlipe Kodi,"
amesema Biteko.
Aidha,
alimpongeza Mkuu wa Wilaya hiyo Godfrey Ngupula kwa kusimamia vizuri Sekta ya
Madini na kuwa karibu na wachimbaji wadogo.
Awali,
katika eneo la Chuo Cha Madini Tawi la Nzega, Mkuu wa Wilaya hiyo Godfrey
Ngupula alimweleza Waziri kuwas shughuli ya uchukuaji mchanga wa Dhahabu
ulioachwa na Kampuni ya Resolute unaofanywa na Kampuni ya Ashery
Construction & Matinje unaendelea vizuri na kuongeza kwamba ifikapo Juni
1 wakati Chuo kitakapofunguliwa zoezi hilo litakuwa limekamilika ns
kuongeza kwamba eneo lililotumika linatarajiwa kutengenezwa ujwanj wa mprira.
Kwa upande
wake, Mwenyekiti wa Chama Cha Mapinduzi Wilaya ya Nzega Amos Kanunda
ameipongeza Serikali kwa kutoa maeneo 10 kwa ajili ya wachimbaji wadogo
Wilayani humo na kusema hivi sasa wachimbaji wanachimba na kuwahimiza kulipa
kodi za serikali huku akisisitiza
suala la wataalam wa Utafiti ili kuwawezesha wachimbaji kuchimba kwa tija
na Serikali inufaike kwa mapato.
Naye,
Mwenyekiti wa Wachimbaji Mkoa wa Tabora (TABOREMA) Joseph Mabondo
amesisitiza suala la Watalaam wa kupima mwelekeo wa miamba kuwawezesha
wachimbaji kuchimba bila kubahatisha. Pia ameipongeza Serikali kuwapatia
wachimbaji Mkoani humo maeneo ya kuchimba
0 comments:
Post a Comment