MTANDAO WA KUENDELEZA VIJANA WENYE VIPAJI (VPN) WAHAMASISHA WADUA KUCHANGIA FEDHA KUSOMESHA WASIO NA UWEZO

Na Mwandishi Maalum

Mtandao wa Kuendeleza Vijana wenye vipaji (VPN) umekutana na wadau jijini Dar es Salaam na kuhamasisha wadau wa mtandao huo na watu wengine kuchangia fedha kusaidia vijana walio na vipaji lakini wazazi wao hawana uwezo kwa ajili ya kuwasomesha katika elimu ya sekondari.

Mtandao huo ulioanzishwa mwaka 2015 kwa lengo la kuwabaini na kufadhili vijana wenye vipaji walio hitimu elimu ya msingi na kidato cha nne lakini familia zao hazina uwezo wa kuwasomesha unataka kuwaendeleza vijana kimasomo ili waweze kutoa mchango katika jamii kwa manufaa ya taifa.

Akizungumza wakati wa hafla ya kuchangisha fedha iliyoambatana na futari kwa wadau wa mtandao huo, mgeni rasmi ambaye ni Afisa Mtendaji Mkuu  Gloucester & Oxford Holdings ya nchini Uingereza Ahmed Dibibi mbali na kushauri watu kuchangia ili kusaidia vijana walio na vipaji, ametaka vijana walio na vipaji  kuangaliwa mienendo yao wakiwa majumbani  ili wasiweze kupotea.

Amesema, iwapo vijana hao hawatakuwa na uangalizi mzuri majumbani mwao basi kuna hatari wakapotea kwa kujiingiza katika mambo yasiyofaa na hivyo kuenda kinyume na maadili sambamba na kupoteza vipaji vyao.

Aidha, ameshauri wazazi kuhakikisha kunakuwa na mipaka katika matumizi ya simu za mkononi kwa vijana hasa katika mitandao ya kijamii kwani watu wengi wamekuwa wakitumia muda mwingi katika simu badala ya shughuli za kujiletea maendeleo.

‘’sasa hivi simu zina mambo mengi kama vile instragram na facebook tuwe na mipaka katika matumizi ya simu, ifikie mahali tujiwekee muda wa kutumia simu ‘’ alisema Dibibi.

Kwa mujibu wa Mtendaji huyo, kama wazazi wanataka mafanikio kwa vijana wao basi wawahimize katika masuala ya mafanikio na kuacha kutumia muda mrefu katika kupumzika na kusisitiza kuwa kila wakati vijana watake kujua elimu ya jumla ambayo itawasaidia sana katika mambo mbalimbali.

Kwa upande wake Mwenyekiti wa Mtandao wa Kuendeleza vijana wenye vipaji Haji Mrisho amesema, tangu kuanzishwa kwa mtandao huo mwaka 2015, wameweza kuwasaidia wanafunzi 151 kutoka mikoa mbalimbali.

Amesema, mtandao wake unawatafutia wanafunzi shule bora pamoja na mfadhili binafsi atakayekuwa tayari kugharamia gharama za masomo kwa mwanafunzi mwenye vipaji katika shule atakayochaguliwa.

Kwa mujibu wa Mrisho, mtandao wa VPN pia una malengo ya kuwasaidia wanafunzi wenye vipaji katika ngazi ya chuo kikuu sambamba na kuangalia uwezekano wa kuwasaidia wale walio na vipaji laikini hawana elimu yoyote lengo likiwa ni kuwainua na kuendeleza vipaji vyao.