Uchukuzi yaibuka kidedea Kombe la Meimosi wazoa vikombe 13

Na Bahati Mollel-TAA, Iringa

KLABU ya michezo ya Uchukuzi iliyopo (Sekta ya Uchukuzi) imebuka kidedea katika michezo ya michuano ya Kombe la Mei Mosi baada ya kushinda vikombe 13 vya michezo 10 iliyoshindaniwa kwenye viwanja mbalimbali mkoani Iringa.

Timu hiyo inayoundwa na wachezaji mahiri imeweza kutwaa ubingwa wa kwanza kwa wanaume katika michezo ya mbio za baiskeli (Chaptele Muhumba), draft (Johanson Ngido), bao (Said Omar) na kuvuta kamba, huku kwa wanawake wametwaa ubingwa katika mbio za baiskeli na riadha (Scolastica Hasiri), bao (Sharifa Amir) na draft olnel) na karata wanawake na wanaume (Zamatradi Yusufu na Mosses Machunda).

Timu ya Shirika la Umeme Tanzania (Tanesco) imeshika nafasi ya pili kwa kujikusanyia vikombe tisa kwa kutwa ubingwa wa soka, riadha wanaume (Lazaro Lugano) huku ushindi wa pili katika michezo ya riadha wanawake (Cartace Manampo), na baiskeli (Happy Mwanga), karata (Sheila Mwihava) na Nkwabi Kadago (mwanaume), na ushindi wa tatu netiboli, Stanley Umbe (baiskeli) na Jackline Massawe (bao).

Timu ya Chuo Kikuu cha Tiba ya Sayansi (MUHAS) wamekuwa watatu kwa kujikusanyia vikombe vitano vya bingwa wa karata wanawake (Emily Kyando), ; mshindi wa pili katika bao (Severina Mnyaga), huku mshindi wa tatu michezo ya kuvuta kamba na baiskeli wanawake (Severina Mnyaga) na dratf (Rebecca Chaula).

Timu ya Mamlaka ya Mapato Tanzania (TRA) wameshika nafasi ya nne kwa kujikusanyia vikombe vinne vya ushindi wa pili katika riadha, baiskeli na bao  wanaume (Michael Luanga),  Nehemiua Johnas na Suleiman Chitanda, huku nafasi ya tatu ya draft ilichukuliwa na Joseph Mlimi.

Timu ya Ofisi ya Taifa ya Ukaguzi wa Hesabu (NAOT) wamejikusanyia vikombe vitatu pekee na kuwa watatu. Vikombe vya ushindi wa pili draft wanawake na wanaume Rosemary Skainde na Alphonce Sika na ushindi wa tatu wa kamba wanaume; nazo timu za Ofisi ya Rais Ikulu, Mamlaka ya Hifadhi ya Ngorongoro (NCAA) na Geita Gold Mine (GGM) kila mmoja wamejikusanyia vikombe viwili, nazo timu za RAS Iringa na Tumbaku ya Morogoro wote wamepata kikombe kimoja-kimoja.

Hatahivyo, mgeni rasmi aliyefunga mashindano hayo yaliyoanza Aprili 17 mwaka huu, Mwenyekiti wa TUICO Taifa, Paul Sangeze alisema ameshangazwa na kusikitishwa kwa wanamichezo wafanyakazi kunyimwa fursa ya kuja kushiriki kwenye michezo hii kwa visingizio mbalimbali, na anaungana na waandaaji kushangaa idadi kuwa ndogo ya washiriki.

“Mashirikisho yote ya wafanyakazi tumesikitika kwa idadi hii ndogo na tutahakikisha miaka ijayo timu zinaongezeka zaidi, na tunaipongeza timu ya netiboli ya Ofisi ya Rais Ikulu kushiriki wameonesha mfano mzuri,” amesema Bw. Sangeze.

Pia amesema michezo mahala pa kazi inasaidia kujenga miili ya wafanyakazi na kuongeza tija na bidii kazini kwani viongozi wasiopenda michezo wanasababisha wafanyakazi kupata magonjwa nyemelezi.

Naye Kaimu Mwenyekiti wa Kamati ya Mei Mosi, Bi. Joyce Benjamin alisema rais John Pombe Magufuli hajawahi kukataza michezo, na inashangaza utashi wa viongozi wasiopenda michezo wanaokataza timu zao kushiriki kwenye michezo.

“Tunaomba viongozi wa vyama vya wafanyakazi wa kila eneo la kazi kuingilia kati juu ya hili katika dhana nzima ya wafanyakazi kufanya michezo na kushiriki kwenye michezo ya mashirikisho mbalimbali kama Shimiwi, Shimuuta na kutofanya michezo kunapingana na ilani ya Chama cha Mapinduzi, inayosema wazi juu ya kuinua michezo nchini,” amesema Bi. Benjamin.

MWISHO