DKT. MWANJELWA – SERIKALI HAITASITA KUMCHUKULIA HATUA WAKALA ATAKAYEVUNJA SHERIA NA TARATIBU ZA NCHI

Naibu Waziri Wizara ya Kilimo Dkt. Mary Mwanjelwa akihutubia sehemu ya Wananchi wa Kijiji cha Luguya Kata ya Mtwango na Tarafa ya Makambako wakati wa Mkutano wa hadhara 

Mbunge wa Jimbo la Lupembe Mhe. Joram Hongoli kumueleza Naibu Waziri wa Kilimo kero mbalimbali za Wakulima wa Jimbo hilo katika mkutano huo mapema leo

Naibu Waziri Wizara ya Kilimo Dkt. Mary Mwanjelwa akipokea risala kutoka kwa Mwanakikundi cha Wakulima wa viazi mviringo wa Kijiji cha Luguya

 Naibu Waziri Wizara ya Kilimo Dkt. Mary Mwanjelwa akiwa pamoja na Mbunge wa Jimbo la Lupembe Mhe. Joram Hongoli wakiwa katika shamba la Mkulima wa mbegu za viazi mviringo Bibi Sara Nyagawa katika Kijiji cha Maduma Kata ya Kichiwa katika Wilaya ya Njombe

 Naibu Waziri Wizara ya Kilimo Dkt. Mary Mwanjelwa akiwa pamoja na Mbunge wa Jimbo la Lupembe Mhe. Joram Hongoli sambamba na Mkuu wa Wilaya ya Njombe, Mhe. Ruth Msafiri pamoja na Mkulima wa mbegu za viazi mviringo Bibi Sara Nyagawa katika Kijiji cha Maduma Kata ya Kichiwa wakitoka shambani na kusindikizwa na ngoma ya Wanakijiji katika ziara hiyo

1   Sehemu ya umati wa Wananchi wa Jimbo la Lupembe wakimuaga Naibu Waziri Wizara ya Kilimo Dkt. Mary Mwanjelwa mara baada ya kuhitimisha ziara yake katika jimbo hilo.

Naibu Waziri wa Wizara ya Kilimo Dkt Mary Mwanjelwa amesema kuwa Serikali ya Awamu ya Tano haitasita kumchukulia hatua kali Wakala yeyote atakayebainika kuvunja sheria na taratibu za nchi.

Dkt Mwanjelwa alitoa onyo hilo wakati wa mkutano wa hadhara katika uwanja wa Kijiji cha Luguya Kata ya Mtwango na Tarafa ya Makambako mara baada ya Mbunge wa Jimbo la Lupembe Mhe. Joram Hongoli kumueleza kuwa Wakulima wa Jimbo hilo wamekuwa wakihangaika kupata pembejeo za kilimo, zikiwemo mbolea za kupandia na kukuzia.

Mbunge huyo amemueleza Naibu Waziri huyo wa Kilimo kuwa kumekuwa na juhudi za makusudi za kuwahujumu Wakulima ambapo mbolea imekuwa ikifika katika Mkoa wa Njombe kutoka bandarini Dar es Salaam na baada ya muda mfupi ukosekana sokoni na chache inayopatikana uuzwa bei ya juu tofauti na bei elekezi ya Serikali.

“Mhe. Naibu Waziri hiki ni kilio cha Wananchi wa Jimbo letu la Lupembe na kama unavyofaham kilimo ndiyo shughuli yetu ya msingi katika maisha ya kila siku, kukosekana kwa mbolea kunarudisha nyuma juhudi za Wananchi wengi” Amekaririwa Mbunge Hongoli.

Dkt Mwanjelwa amesema kilimo ni Sekta wezeshi ya kusukuma mbele juhudi za Serikali ya Awamu ya Tano ya kufikia uchumi wa viwanda ambapo bila malighafi zinazotokana na mazao ya kilimo, kamwe Serikali haiwezi kukaa kimya na kufumbia macho hujuma za Mawakala.

“Nataka Mawakala wote wanaouza mbolea kote nchini, wafahamu kuwa ni marufuku kuficha mbolea au kuuza kinyume cha bei elekezi, ole wake kwa atakayeshindwa kuenenda sawa na matakwa ya Serikali”. Ameonya Dkt. Mwanjelwa.

Dkt. Mwanjelwa amesema kuwa Wizara ya Kilimo imejipanga ili kuhakikisha kuwa msimu wa kilimo unaokuja, mbolea itapatikana mapema na itafika katika Mikoa yote kwa wakati.

Akiongelea kuhusu soko la mazao ya jamii ya nafaka kama mahindi, Dkt Mwanjelwa, amesema Serikali kupitia Wakala wa Taifa wa Hifadhi ya Chakula pamoja na Bodi ya Nafaka na Mazao Mchanganyiko zote kwa pamoja zitapewa fedha za kutosha ili kununua mazao ya Wakulima kwa wingi.

“Tumedhamiria kuimarisha Taasisi yetu ya NFRA na Bodi ya Nafaka na Mazao Mchanganyiko na kwa kuwa Bodi ya Nafaka imepewa Mamlaka ya Kisheria ya kufanya biashara, nawahakikishia kuwa Bodi itanunua mazao ya Wakulima na kuongeza kuwa bado Wananchi wana nafasi ya kufanya biashara ya mazao ya kilimo kwani Serikali imefungua mipaka kwa kila mwenye nia na uwezo wa kuuza mazao nje ya nchi kuufanya”. Amekaririwa Naibu Waziri wa Kilimo.

Wakati huohuo Dkt Mwanjelwa alipata nafasi ya kumtembelea Mama Sara Nyagawa mkulima mzalishaji wa mbegu za viazi mviringo wa Kijiji cha Maduma Kata ya Kichiwa katika Wilaya ya Njombe.

Naibu Waziri alimpongeza Mama Sara Nyagawa kwa kuwa mkulima bora wa kuzalisha mbegu bora za viazi na kuongeza kuwa Taasisi ya Kuendeleza Kilimo katika Ukanda wa Kusini yaani SAGCOT imekuwa chachu ya mafanikio hayo.

Dkt Mwanjelwa amesema Sara Nyagawa amekuwa mfano wa kuigwa na kuongeza kuwa Wakulima ambao wanalima viazi mviringo kama wanataka kupata mazao bora ni vyema kama watajikita katika kutumia mbego bora kwa kuwa tija na uzalishaji mkubwa unaanzia kwenye mbegu.

“Natoa wito, ili Wakulima wa viazi mviringo wapate masoko ya mazao yao ni vizuri wakaanza kwanza kulima kwa kutumia mbegu bora”. Amekaririwa Naibu Waziri.