KATIBU MKUU KIONGOZI ATEMBELEA ENEO UTAKAPOJENGWA MJI MPYA WA SERIKALI MJINI DODOMA

Baadhi ya Makatibu wakuu kutoka Wizara mbalimbali wakifuatilia mada iliyowasilishwa na Mkurugenzi Mkuu wa Shirika la Nyumba la Taifa(NHC) Bw.Nehemia Mchechu(hayupo pichani)  kuhusu ujenzi wa Mji mpya wa Serikali unaotarajiwa kujengwa mjini Dodoma.

Katibu Mkuu Kiongozi Balozi Mha.John Kijazi akipata maelezo kuhusu ujenzi wa Mji mpya wa Serikali unaotarajiwa kujengwa mjini Dodoma katika eneo la Ihumwa kutoka kwa Mkurugenzi wa mipango Miji nchini Profesa John Lupala leo Mjini Dodoma.

Katibu Mkuu Kiongozi Balozi Mha.John Kijazi  akitembelea eneo ambalo utajengwa mji  wa Serikali katika eneo la  Ihumwa leo  Mjini Dodoma.

Katibu Mkuu Kiongozi Balozi Mha.John Kijazi akionyeshwa ramani ya   mpangilio wa mji  wa Serikali utakavyokuwa  na Mkurugenzi wa mipango miji nchini Profesa John Lupala wakati katibu kiongozi alipotembelea eneo hilo na makatibu wakuu leo Mjini Dodoma.

Katibu Mkuu Kiongozi Balozi Mha.John Kijazi akipata maelezo mbalimbali katika eneo ambalo Serikali inajenga mji  katika eneo la ihumwa Mjini Dodoma.Katibu Mkuu Kiongozi aliambatana na Makatibu wakuu wa Wizara mbalimbali katika ziara hiyo.

Katibu Mkuu Kiongozi Balozi Mha.John Kijazi akionyeshwa ramani ya mpango wa matumizi ya ardhi ya eneo ambalo unajengwa mji  wa Serikali na Mkurugenzi Mkuu wa Shirika la Nyumba la Taifa(NHC) Bw.Nehemia Mchechu  katika eneo la Ihumwa  mjini Dodoma.

Katibu Mkuu Kiongozi Balozi Mha.John Kijazi akiuliza swali wakati akionyeshwa ramani ya mpango wa matumizi ya ardhi ya eneo ambalo unajengwa mji  wa Serikali katika eneo la Ihumwa  Mjini Dodoma.Wanaompa maelekezo ni Mkurugenzi wa mipango miji nchini Profesa John Lupala na Mkurugenzi Mkuu wa Shirika la Nyumba la Taifa(NHC) Bw.Nehemia Mchechu

  

Picha zote na Daudi Manongi,MAELEZO,DODOMA.

……………

Frank Mvungi- Maelezo, Dodoma

Katibu Mkuu Kiongozi Balozi Mhandisi John Kijazi na Makatibu Wakuu leo wametembelea na Kukagua eneo utakapojengwa Mji wa Kisasa wa Serikali katika eneo la Ihumwa Mjini Dodoma ili kujionea hatua zilizofikiwa katika utekelezaji wa mradi huo.

Akizungumza katika eneo la mradi unaotarajiwa kutekelezwa katika eneo lenye ukubwa ekari 1500 Balozi Kijazi amesema kuwa Mji huo utakuwa wa kipekee na hiyo ni sehemu ya mikakati ya Serikali kuhakikisha kuwa Makao Makuu ya nchi yanakuwa katika mpangilio wa kisasa ili kuleta tofauti kati ya mji huo na miji  mingine.

“ Niwatoe wananchi shaka kuhusu Serikali kuhamia Dodoma kwa kuwa dhamira ya Serikali ya Awamu ya Tano inayoongozwa na Mhe. Rais Dkt. John Pombe Magufuli imeshaanza kutekelezwa kwa vitendo na sehemu kubwa ya Watumishi wa Serikali wameshahamia hapa Dodoma Wakiwemo Mawaziri na  Makatibu Wakuu” .  Alisisitiza Balozi Kijazi

Akifafanua amesema  kuwa mji huo utakuwa na maeneo kwa ajili ya majengo ya  Wizara, Taasisi, Balozi, na huduma mbalimbali za kijamii  ikiwemo Viwanja vya michezo, Hosipitali, maeneo ya kupumzikia, Maeneo ya Biashara  .

Aliongeza kuwa upatikanaji wa huduma katika  Mji wa Serikali utakuwa wa uhakika  na utakuwa umerahisishwa kutokana na kuwepo kwa Taasisi za Serikali na Wizara zote katika eneo moja.

Kwa upande  wake Mkurugenzi Mkuu wa Shirika la Nyumba la Taifa Bw. Nehemia Mchechu amesema kuwa ni muhimu kuvutia wawekezaji kuja kuwekeza mkoani Dodoma kutokana na mipango ya Serikali kujenga mji huo wa Kisasa wa Serikali.

Aliongeza kuwa mawazo ya awali ya namna ya kujenga mji huo wa Kisasa wa Serikali yapo na kinachosubiriwa ni hatua mbalimbali za kiutendaji  zitakazowezesha kutekelezwa kwa mradi huo.

Uamuzi wa Serikali kuhamia Dodoma umepata msukumo katika kipindi cha  Serikali ya Awamu ya Tano inayoongozwa na Rais Dkt. John Pombe Magufuli na tayari utekelezaji wake unaendelea ambapo Mawaziri wote wameshahamia Dodoma, Makatibu Wakuu na Watumishi Wengine wa Serikali pia wameshahamia.