WARAJIS WASAIDIZI SHIRIKISHENI VYOMBO VYA USALAMA KATIKA UCHAGUZI WA VIONGOZI WA VYAMA VYA USHIRIKA

Kaimu Naibu Mraijis wa Vyama vya Ushirika nchini, Charles Malunde 

Warajis Wasaidizi wa Vyama vya Ushirika wa Mikoa wametakiwa kuwashirikisha Viongozi wa Vyombo vya Usalama katika ngazi ya wilaya kwenye hatua ya upekeuzi wa Wanachama wanaoomba kugombea uongozi katika Vyama vya Ushirika ili kupata viongozi wenye sifa.

Taarifa iliyotolewa na Kaimu Naibu Mraijis wa Vyama vya Ushirika nchini, Charles Malunde kwa Waandishi wa Habari leo, Ijumaa Januari 31, 2020 Jijini Dodoma amewataka pia Warajis Wasaidizi kuhakikisha kuwa wanachama wote wa Vyama vya Ushirika wanapata fursa ya kuchukua fomu za kugombea uongozi katika vyama vyao.

“Warajis Wasaididizi na Maafisa Ushirika walioko katika ngazi za wilaya wahakikishe kuwa viongozi wa Vyombo vya Usalama katika ngazi ya wilaya wanashirikishwa katika hatua ya upekeuzi. Ushirikiano huu utatusaidia kuwapata viongozi waaminifu na waadilifu. Viongozi walioko katika ngazi za vijiji na Kata nao wana mchango mkubwa katika kuwapata viongozi wenye sifa zinazotakiwa; hivyo nao washirikishwe katika zoezi la upekuzi,” amesema Bw. Malunde.

Kaimu Naibu Mraijis wa Vyama vya Ushirika, Bw. Malunde amesema kuwa Mwaka huu 2020 ni mwaka wa uchaguzi katika Vyama vya Ushirika na ametoa rai kwa wanachama kuhakikisha kuwa viongozi wanaowachagua ni wale walio na sifa stahiki watakaowezesha kulinda na kuendeleza mali na maslahi ya Wanaushirika.

“Katika kuhakikisha kuwa Vyama vya Ushirika vinapata viongozi ambao watakuwa na mchango mkubwa katika maendeleo ya ushirika nchini, hatuna budi kushirikiana sote katika kuwapata viongozi hao,” amesema Bw. Malunde.

Kuchaguliwa kwa viongozi wasiokuwa waaminifu na waadilifu katika Vyama vya Ushirika kunasababisha mali za Wanaushirika kuibiwa na viongozi hao na hatimaye vyama hivyo kufilisika. Mwanachama wa kawaida anaweza kuilaum Serikali, bila kujua kuwa viongozi wanaoiba mali za chama chake aliwachagua yeye mwenyewe.

Bw. Malunde amesema kuwa katika tukio la hivi karibuni mkoani Njombe, Naibu Waziri wa Kilimo, Mheshimiwa Hussein Bashe, alitoa maagizo ya urejeshaji mali za ushirika zilizokuwa zimeporwa na Viongozi wasio waaminifu wa Ushirika wa eneo la Lupembe mkoani humo. 

Kutokana na maelekekezo ya Serikali, Tume ya Maendeleo ya Ushirika kwa kushirikiana na Vyombo vya Dola wamefanikiwa kurejesha mali mbalimbali za wanaushirika zilizokuwa zimechukuliwa na wajanja wachache kwa kushirikiana na Viongozi wa Ushirika wa eneo hilo.

 Mali zilizopatikana ni pamoja na magari sita (6): Mitsubish Canter - 3, Toyota land cruiser – 1, Escudo – 1 na Rock – 1; Injini za magari – 2; Jenereta – 1; Mashine nne za kuvunia chai; Shamba moja la chai lenye ukubwa wa hekari 215 na Nyumba moja ambayo iko jirani na shamba la chai la ekari 215 katika kitongoji cha Mbingu kata ya Lupembe.

Zoezi la kuhakikisha urejeshaji wa mali za wanaushirika wa Njombe pamoja na mali za vyama vya ushirika vingine bado linaendelea ili kuhakikisha mali zote za Vyama vya Ushirika zinarejeshwa na kuwekwa katika mikono salama.

“Huu ni mfano dhahiri kuwa tusipokuwa na viongozi waaminifu na waadilifu hakika juhudi za kufufua na kuimarisha ushirika hazitazaa matunda yoyote. Ni imani yangu kuwa kila mdau akisimamia sehemu yake husika na kuisimamia kwa uaminifu tutarejesha heshima ya ushirika iliyopotea kwa muda sasa. Wanachama wa vyama vya ushirika wana mchango mkubwa katika kufanikisha hili,” amesema Kaimu Naibu Mraijis wa Vyama vya Ushirika.