VYAMA VYA USHIRIKA VYASHIRIKI KWA WINGI KATIKA MAONESHO YA NANENANE 2019, SIMIYU

Na Agnes Lubuva, Simiyu

Naibu Mrajis wa Vyama vya Ushirika Bw. Charles Malunde amesema Vyama vya Ushirika havina budi kuendeleza jitihada za kutoa elimu ya ushirika kwa wanachama wa vyama vya ushirika na wananchi wote kwakuwa ushirika ni dhana muhimu yenye mchango mkubwa katika kupambana na umaskini.

Bw. Malunde ameyasema hayo wakati wa uzinduzi rasmi wa maonesho ya Nanenane Kitaifa katika Viwanja vya Nyakabindi Mkoani Simiyu. Alieleza kuwa Tume ya Maendeleo ya Ushirika Tanzania (TCDC) imeshiriki maonesho ya Nanenane kipekee mwaka huu kwa shughuli mbalimbali hususan kushirikisha vyama vya ushirika kwa lengo la kuongeza mwamko na elimu ya ushirika miongoni mwa wananchi.

Kutokana na ushiriki wa vyama hivyo wananchi watapata fursa zaidi ya kuona shughuli za ushirika, kupata maelezo pamoja na kuuliza maswali mbalimbali kuhusu ushirika. Aidha, Bw. Malunde amevitaja vyama vinavyoshiriki maonesho hayo mkoani Simiyu mwaka huu kuwa ni pamoja na Chama cha Ushirika cha Akiba na Mikopo cha Usalama wa Raia (URA SACCOS), Chama cha Umwagiliaji Ruvu (CHAURU), Chama Kikuu cha Ushirika Kagera (KCU), Chama Kikuu cha Ushirika cha Kahama (KACU), Chama Kikuu cha Ushirika Lindi Mwambao, Chama Kikuu cha Ushirika Simiyu (SIMCU), Chama Kikuu cha Ushirika Nyanza (NCU), Chama Kikuu cha Ushirika wa Wavuvi Tanzania (CHAKUWATA), na Rungwe & Busokelo Joint Enterprise Tea Corperative (R.B.T.C.J.E). 

“Tume inashiriki maonesho haya kipekee sana mwaka huu kwa kushirikisha vyama vya ushirika vinavyojihusisha na shughuli mbalimbali kama vile kilimo, ufugaji nyuki, mifugo pamoja na vyama vya akiba na mikopo SACCOS. Vyama hivi vimeshiriki kwaajili ya kuonesha bidhaa na shughuli mbalimbali zinazofanywa na vyama hivyo. Niwasihi wananchi kuitumia fursa hii kupata elimu ya ushirika.” Amesema Malunde

Naibu Mrajis amevipongeza vyama vyote vinavyoshiriki maonesho hayo kwa kushirikiana bega kwa bega na Tume ya Maendeleo ya Ushirika katika kuelimisha wananchi kuhusu masuala ya ushirika katika maonesho hayo.

Kwa upande wake Afisa Ugani wa Chama Kikuu cha Ushirika  Kagera (KCU), Bw. Godfrey Katiti ameunga mkono hatua ya Tume kushirikisha vyama vya ushirika katika maonesho hayo kwani hiyo ni fursa kwao kueleza manufaa ya ushirika na kupata wanachama zaidi. Aidha, Katiti alieleza kuna faida kubwa kwa wakulima na wazalishaji wa mazao kujiunga na vyama vya ushirika kwani vyama hivyo vinawapa nguvu ya pamoja katika kupata mikopo kwa riba nafuu katika Taasisi za fedha pamoja na  bei za mazao zenye ushindani na tija kwa wakulima. Vile vile Katiti alitoa wito kwa wananchi kufika katika banda la KCU kujifunza kuhusu “Kilimo Hai” ambacho ni kilimo kisichotumia Kemikali.

Pamoja na mambo mengine katika “Kijiji cha Ushirika” ambacho ni mkusanyiko wa mabanda mbalimbali ya vyama vya ushirika, taasisi na wadau wa sekta ya ushirika, wananchi na wanachama wa vyama vya ushirika wanapata fursa ya kujua masuala mengi kama vile haki na wajibu wao katika vyama, majukumu ya wanachama ikiwa ni pamoja na kusimamia shughuli za uendeshaji wa chama, kuhakikisha hesabu za vyama vya ushirika zinaandaliwa kwa wakati, kuchangia mawazo ya uboreshaji wa utendaji wa vyama, kushiriki mikutano na vikao, kulipa malipo ya hisa, kiingilio na michango mingine kwa mujibu wa taratibu za vyama vya ushirika.

MWISHO.