WAZIRI HASUNGA AIPONGEZA TUME YA MAENDELEO YA USHIRIKA

Waziri wa Kilimo Mhe. Japhet Hasunga (katikati), Mkurugenzi Mkuu wa NIC Dkt. Elirehema Doriye, akifuatiwa na Mwenyekiti wa Tume ya Ushirika Dkt.Titus Kamani, kushoto ni Mkuu wa Mkoa wa Simiyu Mhe. Antony Mtaka pamoja na viongozi wengine wa sekta ya kilimo na Ushirika wakiwa katika picha ya pamoja na viongozi wa Vyama vya ushirika waliopata vyeti  vya utambuzi kwa mchango katika Kilimo na Ushirika

Waziri wa Kilimo, Mhe. Japhet Hasunga ameipongeza Tume ya Maendeleo ya Ushirika Tanzania kutokana na  Uhamasishaji, Usimamizi, Udhibiti na Ufuatiliaji wa shughuli za Ushirika na kuhakikisha kwamba Vyama vya Ushirika hapa nchini vinatekeleza majukumu yao kwa ufanisi mkubwa na kuleta tija kwa wanaushirika na jamii kwa ujumla.

Waziri Hasunga alikuwa Mgeni Rasmi katika Siku Maalum ya Ushirika kwenye Maonesho ya Nanenane Kitaifa 2019 ambapo alizindua Bima ya Mazao iliyoandaliwa na Wizara ya Kilimo kwa kushirikiana na Shirika la Bima ya Taifa (NIC). Bima ambayo itawezesha mkulima, mfugaji na mvuvi kulindwa kwa kupunguza hasara ambayo anaweza kuipata.

Akizungumza leo Jumamosi, Agosti 03, 2019 katika uwanja wa Maonesho ya Kilimo Nyakabindi – Simiyu kwenye siku maalumu ya kuhamasisha ushirika kupitia utekelezaji wa programu ya kuendeleza Sekta ya kilimo  Awamu ya Pili (ASDP II) iliyotengwa  kwa ajili ya kutangaza shughuli za ushirika, mafanikio yaliyopatikana na kuhamasisha wazalishaji kupitia sekta za Kilimo, Ufugaji na Uvuvi kujiunga na ushirika. Kutokana na hatua mbalimbali za uboreshaji wa Sekta ya Ushirika idadi ya vyama hivyo vimeongezeka. 

“Hadi kufikia mwezi Mei, mwaka 2019, nchi yetu ina jumla ya Vyama vya Ushirika 11,331 vyenye idadi ya wanachama 4,611,804 na wanachama tarajiwa 765,804. Idadi hii imeongezeka kutoka Vyama vya Ushirika 10,990 vyenye wanachama 2,619,311 kwa mwaka 2018. Hivyo kwa kipindi cha mwaka mmoja jumla ya Vyama vya Ushirika 341 na Wanachama 1,991,960 wameongezeka katika mtiririko huo.” Alisema Hasunga

Pia aliongeza kuwa hadi kufikia mwezi Februari 2019, Tume ilifanya ukaguzi wa mara kwa mara kwa vyama vya ushirika 3,140 sawa na asilimia 54 ya lengo la kukagua vyama 5,830. 

Katika maadhimisho hayo, Waziri Hasunga alitoa vyeti vya utambuzi kwa Vyama vya Ushirika na Taasisi zenye mchango katika maendeleo ya Sekta ya Kilimo, Mifugo na Uvuvi.  Taasisi hizo zilizopata vyeti hivyo ni pamoja na; Chuo cha Ushirika Moshi (MoCU), COASCO, FSDT, Mbozi Coffee Curing Company Limited, TANESCO SACCOS na URA SACCOS.

Akimkaribisha Mhe. Waziri, kuongea na wakulima pia kuzindua Bima ya  Mazao na  kutoa vyeti vya utambuzi kwa mchango wa Vyama vya Ushirika na Wadau katika maendeleo ya sekta ya Kilimo, Katibu Mkuu wa Wizara ya Kilimo, Mhandisi Mathew Mtigumwe amewashukuru wakulima, wafugaji na wavuvi kwa juhudi zao kubwa katika uzalishaji wa mazao mbalimbali na alieleza umuhimu wa wazalishaji wa mazao mbalimbali kupewa kipaumbele na kuhusishwa kwenye masuala ya kilimo na ushirika.

“Tukio hili la uzinduzi wa Bima ya Mazao na utoaji wa vyeti kwa Vyama vya Ushirika ni dhamira dhahiri ya Serikali katika kuhakikisha mkulima, mfugaji na mvuvi anahusishwa vyema kuendeleza sekta ya kilimo.”

MWISHO