MAFUNZO KWA WALIMU WA URAIA YATOLEWA ZANZIBAR

Na Kudra Mawazo, Zanzibar

Kituo cha huduma za sheria Zanzibar kimetoa mafunzo kwa walimu wa sekondari na msingi wa somo la uraia kwa lengo la kuwajengea uwezo walimu wa somo hilo, mafunzo hayo yanatolewa kwa walimu wa shule zilizopo  kwenye  mikoa yote mitatu ya unguja.

Kaimu mkurugenzi mtendaji wa kituo hicho hicho Ally Haji amesema kuwa kituo kimekuwa na utaratibu wa kuwapa mafunzo mbalimbali ili kuweza kuwasomesha wanafunzi  na kuwapa mbinu mbali mbali za jinsi ya kuweza kutatua matatizo yanawakabili.

Alisema kuwa elimu ya uraia katika jamii inaweza kumuongoza mwanajamii katika ushiriki wa ulinzi wa taifa lake,kutambua wajibu na haki zao,kuthamini na kutetea katiba za nchi pamoja na kuelewa misingi ya utawala wa kidemocrasia.

Haji amewataka walimu hao kuyatumia mafunzo wanayopatiwa kwa lengo la kuwapa wanafunzi stadi na ufahamu,maadili,maarifa na muelekeo utakaowawezesha kushiriki katika mambo mbalimbali ya kuijenga nchi yao.

Alisema kuwa elimu ya uraia ni moja ya njia ya kumfahamisha mwananchi umuhimu wa kutafuta na kutunza cheti cha kuzaliwa na masuala yanayohusu usajili wa vizazi na vifo,ufatiliaji wa kitambulisho cha utaifa na kujua umuhimu wa nyaraka hizo muhimu.

Alisema kuwa kukosekana kwa elimu ya uraia kwa jamii imepelekea baadhi ya wananchi kushindwa kujua umuhimu wa vitu hivyo na kushindwa kuvifatilia.

Hata hivyo Haji alisema ni muda sasa umefika kwa walimu wa somo la uraia kuwafundisha wanafunzi elimu ya sheria na katiba na ni wajibu wa walimu wa somo la uraia kuwajibika katika kuwafundisha wanafunzi Kwa ufanisi na weledi kwa lengo la kupata kizazi kizuri kitakacho kuwa kinafuata kwa vitendo elimu ya uraia.