Uharibifu wa mitambo wamkera Muhongo

WAZIRI wa Nishati na Madini, Profesa Sospeter Muhongo ameelezea masikitiko yake juu ya kuharibika ndani ya muda mfupi kwa mitambo ya kufua na kuzalisha umeme na kuongeza kuwa, jambo hilo linamkera mno.


Aidha, amesema ili kuiondolea mikoa ya Lindi na Mtwara tatizo la kukatika mara kwa mara umeme, nguvu kubwa inaelekezwa katika kuhakikisha mikoa hiyo inaingizwa katika Gridi ya Taifa. Profesa Muhongo aliyasema hayo bungeni jana wakati akitoa majibu ya ufafanuzi katika swali la nyongeza la Mbunge wa Kilwa Kaskazini, Vedasto Ngombale (CUF).

Ngombale alitaka kufahamu hatua ambazo serikali inachukua kukabiliana na uharibifu wa mitambo inayoharibika ndani ya muda mfupi baada ya kujengwa kwake. Katika swali la msingi, alitaka kufahamu kama serikali inaweza kuwaambia wananchi kiini hasa cha kukatika kila siku kwa umeme unaozalishwa kutokana na gesi ya Songosongo.

“Hapa tusidanganyane, ni ukweli usiopingika kuwa, mitambo ya Somanga Fungu ina matatizo makubwa, licha ya kuwa ilijengwa kama miaka miwili iliyopita,” alisema Profesa Muhongo na kupongeza kuwa mbali ya mitambo hiyo, lakini pia mitambo ya Nyakato, Mwanza na ya Ubungo, Dar es Salaam nayo imekuwa na shida, kwani ilianza kuharibika miaka miwili baada ya kujengwa.

“Kwa nini iharibike baada ya miwili miwili? Tusidanganye….kuna tatizo,” alihoji Profesa Muhongo na kuongeza kuwa ili kukabiliana na adha ya umeme katika mikoa ya Lindi na Mtwara, serikali imeona suluhisho ni kuiunganisha katika Gridi ya Taifa na kwamba kazi ya kujenga njia mpya ya umeme wa kilovoti 132 ili iachane na umeme wa kilovoti 33 wa sasa, inaendelea."

Alisema kama kila kitu kitakwenda sawa, kazi hiyo inatarajiwa kukamilika Novemba mwaka huu na kwamba mradi huo utagharimu Sh bilioni 3.