SUWASA SINGIDA YAZINDUA WIKI YA MAJI KIMKOA // YAWAITA WANAODAIWA ANKARA ZA MAJI KUZUNGUMZA, TEKNOLOJIA YA E-WATER WALETA NEEMA. KAULIMBIU `Maji chini ya ardhi Hazina isiyoonekana kwa maendeleo endelevu’ ~ WAZO HURU

Mwenyekiti wa Bodi ya Mamlaka ya Maji Safi na Usafi wa Mazingira Singida (SUWASA) Mhandisi Deogratius Kamala akimtwisha Ndoo ya maji Mkazi wa Mwankoko, Manispaa ya Singida Remister Mkhotia ikiwa ni moja huduma inayotolewa kwa sasa na mamlaka hiyo kwa kutumia teknolojia ya utoaji maji kupitia Magati kwa mfumo wa e-water wakati wa uzinduzi wa wiki ya maji kwa mkoani Singida.

1. Kaimu Mkurugenzi Mkuu wa Suwasa Hosea Maghimbi akitoa ufafanuzi kwa Mwenyekiti wa Bodi ya SUWASA Mhandisi Deogratius Kamala wa namna ya uendeshaji mitambo iliyopo kwenye chanzo cha maji cha Mamlaka hiyo kilichopo eneo la Mwankoko.

1. Muonekano wa mitambo ya kusukuma maji iliyopo kwenye chanzo cha maji Mwankoko.

Baadhi ya Maafisa wa maji wakifuatilia uzinduzi wa wiki ya maji

Mwenyekiti wa Bodi ya Mamlaka ya Maji Safi na Usafi wa Mazingira Singida (SUWASA) Mhandisi Deogratius Kamala akizungumza kwenye uzinduzi wa wiki ya maji kimkoa

1. Diwani wa kata ya Mandewa Baraka Hamis akizungumza kwenye uzinduzi huo.

1. Moja ya Miundombinu ya maji iliyojengwa eneo la Mandewa

Na Hamis Hussein - Singida

KATIKA kuadhimisha wiki ya Maji Mamlaka ya Maji Safi na Usafi wa Mazingira Singida (SUWASA) imewataka wananchi wote mkoani hapa kuhakikisha wanaendelea kutunza vyanzo vyote vya maji vilivyopo sambamba na kufichua taarifa za kihalifu dhidi ya yeyote mwenye nia ovu ya kuhujumu miundombinu ya rasilimali za maji kwa ustawi endelevu wa rasilimali hiyo muhimu isiyo na mbadala wake.

Aidha, kupitia maadhimisho hayo yenye kauli mbiu isemayo; ‘Maji chini ya Ardhi Hazina Isiyoonekana kwa Maendeleo Endelevu,’ Suwasa imesisitiza umuhimu wa watumia huduma hiyo kulipa Ankara za maji kwa wakati sanjari na kuwataka wote wenye malimbikizo ya madeni kufika katika ofisi hizo kwa lengo la kuingia mikataba maalumu na mamlaka hiyo ili kuweza kulipa bili husika ndani ya wakati.

Akizungumza katika uzinduzi wa wiki ya maji mkoani hapa iliyoshirikisha SUWASA, Wakala wa Maji na Usafi wa Mazingira Vijijini (RUWASA), Chuo cha Maji Tawi la Singida, Bonde la Kati na Maabara za Ubora wa Maji, Mwenyekiti wa Bodi ya Suwasa Mhandisi Deogratius Kamala alisema maadhimisho ya mwaka huu ni mahsusi kwa ajili ya utoaji elimu, kueleza kwa umma miradi inayotekelezwa sanjari na kupokea maoni kutoka kwa watumia huduma za maji

“Maadhimisho ya mwaka huu yanafanyika nchini kote tangu Machi 16 mpaka kilele chake ifikapo Machi 22 ikiwa ni kwa mujibu wa azimio la Umoja wa Mataifa la mwaka 1946,” alisema Mhandisi Kamala

1. Kaimu Meneja wa ufundi wa Suwasa Mhandisi Elisha Kivuyo akitoa maalezo ya kitaalamu kwenye eneo la matenki ya kuhifadhi na kutibu maji yaliyopo eneo la Mandewa

Hata hivyo, alisisitiza jamii kuendelea kuenzi, kutunza, kulinda na kuheshimu vyanzo vya maji vilivyopo ili kwa pamoja na umoja kuwezesha jamii na mamlaka za maji zilizopo ili kuifanya rasilimali hiyo kuwa endelevu kwa vizazi vya sasa na baadaye.

1 Baadhi ya Maafisa wa maji wakifuatilia uzinduzi wa wiki ya maji.

1. Baadhi ya Vifaa vya kisasa vya kutoa huduma za kuhifadhi na kutibu maji yanayotoka kwenye chanzo cha maji Mwankoko.

Kwa upande wake, Kaimu Mkurugenzi Mkuu wa Suwasa Hosea Maghimbi alisema mamlaka hiyo kwa kiasi kikubwa inategemea ushirikiano wa jamii hususani kwenye eneo la kunyanyua mapato katika kuiwezesha kufanikisha azma yake chanya ya kuendelea kusogeza karibu huduma zake kwa tija na ufanisi.

Kaimu Meneja wa ufundi wa Suwasa Mhandisi Elisha Kivuyo aliitaja baadhi ya miradi inayotekelezwa na mamlaka hiyo kuwa ni pamoja na ujenzi wa tanki la maji lenye ujazo wa kutunza maji mita cubic 200 pamoja na pampu za kuwezesha kusukuma maji hadi eneo la Somoku ,

Aidha mradi mwingine ni ujenzi wa kisima eneo la Unyambwa ambao umekamilika na hatua inayofuata ni uwekaji wa miundombinu ya umeme na pampu za kusukuma maji lengo ni kuhakikisha eneo lote la manispaa linakuwa na huduma za maji za uhakika.

“Nitoe rai kwa wananchi kuchangamkia ofa ya kuunganishiwa maji kwa gharama ya shilingi laki moja pekee kwa wakazi wote wanaoishi kuzunguka eneo la mradi, lakini pia wafike ofisi za Suwasa ili kujipatia huduma zingine zinazoendelea kutolewa kupitia miradi mbalimbali inayotekelezwa kwa fedha za Uviko”

Katika hafla ya uzinduzi huo wadau mbalimbali wa maji na wananchi wakiongozwa na Diwani wa Kata ya Mandewa Baraka Hamis walipata fursa ya kutembelea miradi mbalimbali inayotekelezwa na suwasa ndani ya manispaa mkoani hapa, ikiwemo chanzo cha maji Mwankoko, Matanki makubwa ya kuhifadhi maji eneo la mandewa na kuangalia moja ya teknolojia ya mfumo wa utoaji wa maji kupitia Magati kwa mfumo wa e-water.

Kupitia Mfumo huo, ikilinganishwa na kipindi cha nyuma kwa sasa kuna mabadiliko makubwa kutokana wananchi wenyewe kujipatia huduma ya maji bila ya uwepo wa wakala kama ilivyokuwa hapo awali.