WAKONGWE MKOA WA IRINGA WATETEA MAJIMBO YAO ISMANI,KALENGA,MUFINDI KUSI,KASKAZINI,,,,,,,,,,,

Jimbo la Iringa Mjini

MKUU wa wilaya ya Wanging’ombe, Frederick Mwakalebela ameibuka kidedea katika kura za maoni za kutafuta kuteuliwa kugombea ubunge jimbo la Iringa Mjini kwa kuwabwaga vibaya washindani wenzake 12.

Mmoja wa wagombea aliyebwaga katika kura hizo ni Mwenyekiti wa CCM wa Mkoa wa Iringa, Jesca Msambatavangu aliyekuwa akipewa nafasi kubwa ya kuwa mshindi kwa kuzingatia nafasi aliyonayo ndani ya chama na nguvu yake kisiasa mjini Iringa.

Katika kura hizo, Mwakalebela alipata kura 4,388 huku Msambatavangu akijinyakulia kura 2,077 zilizompa ushindi wa pili, huku nafasi ya tatu ikienda kwa Dk Yahaya Msigwa aliyepata kura 1,097.

Akitangaza matokeo ya uchaguzi huo, Katibu wa CCM Manispaa ya Iringa, Elisha Mwampashi aliwataja wengine na kura zao kwenye mabano kuwa ni Dk Augustino Maiga (745), Mahamudu Madenge (423), Addo Mwasongwe (259), Nuru Hepautwa (191), Frank Kibiki (183), Michael Mlowe (183), Fales Kibasa (171), Aidan Kiponda (135), Peter Mwanilwa (79) na Agustino Mwilonge (66).

Jimbo la Isimani

Waziri wa Ardhi Nyumba na Maendeleo ya Makazi, William Lukuvi ametetea nafasi yake baada ya kuzoa kura 10,799 kati ya kura 12,560 zilizopigwa.

Lukuvi alifuatiwa kwa mbali na Mkuu wa Wilaya ya Misenyi, Festo Kiswaga aliyejipatia kura 1,237.

Katibu wa CCM Iringa Vijijini, Dodo Sambu aliwataja wengine na kura zao kwenye mabano kuwa ni Hamis Malinga (323), Sebastian Kiyoyo (155), , Elias Luputiko (62).

Jimbo la Kalenga

Matumaini ya Mkuu wa Mkoa wa Mbeya, Abbas Kandoro kuwatumikia wananchi wa jimbo la Kalenga kwa kupitia nafasi ya ubunge huenda yakawa yamepotea kabisa baada ya kuambulia kura 674 kati ya kura 22,253 zilizopigwa.

Hii ni mara ya pili kwa Kandoro kuonesha nia ya kuwatumikia wananchi wa jimbo hilo bila mafanikio, mara ya kwanza ikiwa ni katika kura za maoni za 2010  alipoambulia kura 2,353 dhidi ya kura 2,819 alizopata aliyekuwa mbunge wa jimbo hilo, Dk William Mgimwa.

Katibu wa CCM Iringa Vijijini Dodo Sambu alimtaja mshindi wa kura hizo za maoni kuwa ni mbunge wa jimbo hilo anayemaliza muda wake, Godfrey Mgimwa aliyezoa kura 15,550.

Wengine na kura zao kwenye mabano ni Jackson Kiswaga (3,439), George Mlawa (301) na Kibasa Kibasa (289).

Jimbo la Mafinga Mjini

Afisa wa Wizara ya Mambo ya Nje na Ushirikiano wa Kimataifa, Cosato Chumi ameibuka mshindi kwa kuzoa kura 3,683.

Chumi amaye ushindi wake ulidhihiri kujionesha mara tu baada ya kutangaza nia ya kuwani ubunge katika jimbo hilo hivikaribuni, alifuatiwa kwa mbali na Zuberi Ngullo aliyepata kura 700 huku James Mgimwa akipata kura 378, Benjamin Balali kura 302 na Paulo Muyinga akiambulia kura 19.

Jimbo la Mufindi Kaskazini na Mufindi Kusini

Hadi tunakwenda mitambo zoezi la kuhesabu kura lilikuwa likiendelea huku taarifa za awali zikionesha Naibu Waziri wa Maliasili na Utalii, Mahamudu Mgimwa kuibuka mshindi katika jimbo lake la Mufindi Kaskazini.

Huko Mufindi Kusini, taarifa za awali zinaonesha kumpa ushindi mbunge anayemaliza muda wake, Mendrad Kigola.

Jimbo la Kilolo

Hadi tunakwenda mitambani hakukuwepo na taarifa rasmi za matokeo ya jimbo hilo japokuwa wapambe wa wagombea wawili kati ya 15 waliojitokeza kuwania jimbo hilo, wamejitapa kushinda kura hizo za maoni.

Wakati wapambe wa mbunge anayemaliza muda wake, Profesa Peter Msolla wakidai kupata ushindi wa kishindo wa kura zaidi ya 13,000 nao wapambe wa Mkuu wa Wilaya ya Kaliua Tabora, Venance Mwamoto wanadai mgombea wao ameshinda japokuwa hawakutaja idadi ya kura walizopata.