TUMBAKU YATAJWA KUWA ZAO LINALOCHANGIA KWA KIASI KIKUBWA PATO LA TAIFA

WAKULIMA hususani  wa zao la tumbaku hapa nchini wametakiwa kuachana  na dhana potofu kuhusu kilimo cha zao hilo na badala  yake wafuate maelekezo kutoka Taasisi ya Utafiti wa Tumbaku Tanzania (TORITA) ili kuongeza tija kwenye uzalishaji kwa faida yao na taifa kwa ujumla.

Licha ya kutozungumzwa sana  lakini zao hilo linatajwa kuchangia kwa kiasi kikubwa kwenye pato la taifa kutokana na fedha za kigeni na kwa mujibu wa Taasisi hiyo  kwa  mwaka 2021 zao la Tumbaku liliingiza  Taifa fedha za kigeni dola milioni 127.5 na kuendelea kuwa na mchango mkubwa  hapa nchini.

Akizungumza na waandishi  wa habari  Dr. Jacob  Lisuma Mkurugenzi wa  Taasisi ya Utafiti wa Tumbaku Tanzania (TORITA) anasema tangu kuanzishwa kwa  TORITA  kumekuwa na msaada mkubwa kwa wakulima hali iliyosababisha kuongezeka kwa uzalishaji wa zao la Tumbaku.