KAMATI YA BUNGE YA ARDHI,MALIASILI NA UTALII YAPOKEA TAARIFA YA UTENDAJI WA WIZARA YA MALIASILI NA UTALII

Kamati ya Bunge ya Ardhi, Maliasili na Utalii  imeitaka Wizara ya Wizara hiyo kufanyia kazi maoni yaliyotolewa na wajumbe wa Kamati hiyo  katika  kukabiliana na changamoto ya wanyamapori wakali na waharibifu pamoja na migogoro kati ya wananchi na maeneo yaliyohifadhiwa.

Akizungumza katika kikao cha cha kupokea taarifa ya Wizara ya Maliasili na Utalii kuhusu Utekelezaji wa Mpango na Bajeti kwa kipindi cha nusu mwaka (Julai-Desemba, 2022) katika kikao kilichofanyika leo jijini Dodoma ambapo Mwenyekiti wa Kamati hiyo  Ally Juma Makoa  ameipongeza Wizara hiyo kwa kuendelea kutekeleza majukumu yake yakiwemo yale ya changamoto za wanyamapori.

“Wizara mnafanya kazi nzuri tunaziona, changamoto zinazoendelea kujitokeza naomba muendelee kuzitatua kwa wakati”, Makoa alisisitiza

Makoa ameitaka Wizara hiyo kufanyia kazi maoni yaliyotolewa na wajumbe wa Kamati hiyo hususani katika eneo la kukabiliana na changamoto ya wanyamapori wakali na waharibifu pamoja na migogoro kati ya wananchi na maeneo yaliyohifadhiwa.

“Katika kutatua na kumaliza migogoro inayotuhusu nashauri tuendelee kutumia busara ili wananchi waweze kuishi kwa amani na kuendelea kushiriki kikamilifu katika shughuli za uhifadhi” Amesisitiza Mhe. Makoa.

Kwa upande wake Naibu Waziri wa Maliasili na Utalii,Mary Masanja  ameishukuru Kamati hiyo na kuahidi kufanyia kazi mapendekezo yote yaliyotolewa ili kuikuza Sekta ya Maliasili na Utalii na hatimaye kuongeza pato la Taifa.

Miongoni mwa masuala yaliyojadiliwa ni utekelezaji wa miradi ya maendeleo ikiwamo Mradi wa Usimamizi wa Maliasili na Kuendeleza Utalii Kanda ya Kusini (REGROW), Mradi wa Kukabiliana na Ujangili na Biashara Haramu ya Wanyamapori, Mradi wa Panda Miti Kibiashara, Mradi wa Kuwezesha Mnyororo wa Thamani wa Mazao ya Nyuki (BEVAC), Mradi wa Kuongeza Thamani kwa mazao ya Misitu (FORV AC) na ukamilishaji wa baadhi ya shughuli za Mpango wa Ustawi kwa Maendeleo ya Taifa na Mapambano Dhidi ya UVIKO-19.