BARAZA LA BAKWATA MKOA WA DODOMA LIMEFANYA UCHAGUZI WA MWENYEKITI NA WAJUMBE WA BARAZA LA BAKWATA LA MKOA HUO

Sheikh wa mkoa wa dodoma Mustapha Rajabu akizungumza na wajumbe wa Baraza la bakwata mkoa kwenye uchaguzi wa mwenyekit na wajumbe wa halimashauri kuu bakwata Mkoa wa Dodoma.

Sheikh wa mkoa wa dodoma Mustapha Rajabu akiwa kwenye picha ya pamoja na Mwenyekiti wa Halmashauri Kuu ya Baraza la bakwata mkoa wa Dodoma japhari Mwenyemba,Mwenyekiti wa uchaguzi huo na Mkurugenzi wa Elimu Bakwata Taifa,Ally Abdallah pamoja  na wajumbe wa baraza la bakwata la mkoa huo.

BARAZA Kuu la Waislamu Tanzania (Bakwata) Mkoa wa Dodoma limemchagua Japhari Mwanyemba kuwa Mwenyekiti wa Halmashauri Kuu ya Baraza hilo kwa Mkoa wa Dodoma.

Mwanyemba ambaye amewahi kuwa Meya wa Jiji la Dodoma pia ni Diwani wa Kata ya Makole Jijini hapa.

Mwenyekiti huyo alichaguliwa juzi Jijini hapa katika uchaguzi uliowashirikisha wajumbe wa Baraza hilo kwa Mkoa wa Dodoma.

Akitangaza matokeo Mwenyekiti wa uchaguzi huo na Mkurugenzi wa Elimu Bakwata Taifa,Ally Abdallah alimtangaza Mwanyemba kushinda kwa kura zote za ndio ambazo ni 37.

Pia,wajumbe hao walimchagua,Kakogwe Luambano kuwa Mjumbe wa Halmashauri Kuu ya Bakwata anaeuwakilisha Mkoa wa Dodoma.

Vilevile  waliwachagua Masheikhe 10 ambao ni wajumbe wa Baraza la Masheikhe Mkoa  na Wajumbe 10 wa Halmashauri kuu ya Bakwata Mkoa wa Dodoma.

Akizungumza mara baada ya kuchaguliwa,Mwenyekiti wa Halmashauri kuu ya Bakwata Mkoa,Mwanyemba aliomba ushirikiano huku akiwataka Masheikhe kuyatumia machinjio kama njia ya kuliongezea mapato Baraza.

"Tunajenga Bakwata mpya tunataka kila kitu kionekane na kinyooke,niwaombe tuliochaguliwa tuwalinde Masheikhe,lakini kubwa tutambue mali zetu,tukusanye mapato,"alisema.

Kwa upande wake,Sheikhe wa Mkoa wa Dodoma, Mustapha Rajabu aliwataka viongozi hao waliochaguliwa kubadilika, kujitambua na kuacha kuishi kwa mazoea.

Vilevile,alisema wanatakiwa kuisemea vizuri Serikali ya awamu ya tano akiwemo Rais wa Jamhuri ya Muungano wa Tanzania na viongozi Wakuu.

"Rais wetu ametuongoza vizuri na maandiko yanasema waheshimuni na kuwatii wenye Mamlaka,sisi lazima tumtii na kumsemea vizuri Rais wetu,msemeeni vizuri,"alisema.

Akitoa neno la shukrani,mara baada ya kuchaguliwa,Mjumbe wa Halmashauri kuu Bakwata anaeuwakilisha Mkoa wa Dodoma,Luambano alisema,Makatibu,Masheikhe na Wenyeviti wl kuifuata Katiba ya Baraza hilo kwani kwa kufanya hivyo mambo yataenda vizuri na hakutakuwa na malalamiko.

Naye,Mwakilishi wa Baraza la Masheikhe Mkoa wa Dodoma,Sheikhe Saidi Rajabu akitoa neno la shukrani aliwataka viongozi wenzake wa dini kwenda kufanya kazi kwa kumuogopa Mwenyezimungu.