Wizara ya Nishati yaanza uandaaji mikataba ya utendaji kazi katika utumishi wa umma

Baadhi ya Wakuu wa Idara na Vitengo wa Wizara ya Nishati wakimsikiliza Katibu Mkuu wa Wizara ya Nishati, Dkt Hamisi Mwinyimvua (hayupo pichani) kabla ya kuanza kazi ya uandaaji wa mikataba ya utendaji kazi katika utumishi wa umma kwa mwaka 2019/2020.

 Baadhi ya Wataalam wa Wizara ya Nishati wakiwa katika  kazi ya uandaaji wa mikataba ya utendaji kazi katika utumishi wa umma kwa mwaka 2019/2020.

Katibu Mkuu wa Wizara ya Nishati, Dkt Hamisi Mwinyimvua (katikati) akizungumza na Wakuu wa Idara na Vitengo wa Wizara ya Nishati kabla ya kuanza kazi ya uandaaji wa mikataba ya utendaji kazi katika utumishi wa umma kwa mwaka 2019/2020.

Na Teresia Mhagama

Wizara ya Nishati, imeanza kazi ya uandaaji wa mikataba ya utendaji kazi katika utumishi wa umma kwa mwaka 2019/2020.

Kazi hiyo inayofanyika jijini Dodoma, imeratibiwa na Idara ya Sera na Mipango katika Wizara ya Nishati ambapo uandaaji wa mikataba hiyo unafanyika kwa uongozi wa Ofisi ya Rais, Menejimenti ya Utumishi wa Umma na Utawala Bora.

Akizungumza na Menejimenti ya Wizara ya Nishati kabla ya kuanza rasmi kazi ya uandaaji wa mikataba hiyo, Katibu Mkuu wa Wizara ya Nishati, Dkt Hamisi Mwinyimvua, alisema kuwa,  mikataba hiyo ni muhimu kwani katika kila mwaka itapima kama watumishi wa umma wanatekeleza majukumu kadri ya malengo yaliyowekwa kupitia Wizara, Taasisi,  Idara au Kitengo.

Aliongeza kuwa, Watumishi wa Wizara ya Nishati, watakaohusika katika uandaaji wa mikataba hiyo watapata uelewa zaidi kuhusu uandaaji wa malengo ya Wizara, utekelezaji wake pamoja na upimaji wa malengo husika.

Kwa upande wake, Mkurugenzi wa Sera na Mipango, Wizara ya Nishati, Haji Janabi, alitoa wito kwa watumishi walioteuliwa kufanya kazi hiyo, kuhakikisha kuwa wanaifanya kazi hiyo kwa ufanisi na kuikamilisha kwa wakati uliopangwa ili ianze kutumika ndani ya muda uliopangwa na Serikali.