WANANCHI WATAKIWA KUSHIRIKIANA NA POLISI KUTOKOMEZA UHALIFU

Na Emmanuel Michael Senny, Kigoma 

Mkuu wa wilaya ya Buhigwe mkoani Kigoma, Luten Kanal Michael Ngayalina amewata wananchi kushirikiana kikamilifu na jeshi la polisi wilayani humo kwa kutoa taarifa za wahalifu na uhalifu ili hatua zichukuliwe mapema.

Kanal Ngayalina aliyasema hayo wakati akizungumza na wananchi wa kata ya Kajana wilayani humo katika mkutano wa kuhamasisha ulinzi na usalama wa nyumba kumi kumi na kuongeza kuwa hatavumilia vitendo vya uhalifu katika halmashauri hiyo.

Aliongeza kuwa mtu yeyote atakaye kamatwa hatua kali za kisheria zitachukuliwa dhidi yake na kwa wananchi atakayebainika akishirikiana na wahalifu nae pia atachukuliwa hatua ili iwe fundisho kwa wengine. 

"Siwezi kukubali wilaya yangu kuwa na matukio ya kihalifu hivyo basi polisi simamieni hili kikamilifu lakini pia wananchi muwe mstari wa mbele kutoa taarifa za wahalifu ili kuendelea kulinda amani ya wilaya na nchi kwa ujumla" alisema Ngayalina. 

Kwa upande wake Mkuu wa Jeshi la Polisi wilaya ya kipolisi Manyovu Buhigwe  Omari Mzuza, alibainisha kuwa wananchi walio wengi wanawaficha wahaifu bila kujua huku akiwataka kuwa wepesi wa kutoa taarifa kwa kila mgeni anayeingia kijijini.

"Wilaya yetu iko  mpakani hivyo tunapokea wageni wa kila aina na wengi wetu tunapokea na kukaa na wahalifu bila kujua kwahiyo kabla ya kukaribisha mgeni peleka taarifa kwa uongozi wa kijiji ili mgeni atambulike na sisi kama polisi tutashughurikia uhalifu wilayani hapa" alisema Mzuza. 

Naye mwenyekiti wa serikali ya kijiji cha Kasumo Damasi Gabriel alisema uwepo wa nyumba kumi za ulinzi na usalama umesaidia kupunguza uhalifu na kwamba doria za kila siki ndani ya kijiji hicho zimeongeza uwepo wa amani kwa wananchi.

Mwisho