SERIKALI YASHIRIKIANA NA WANANCHI KUPANDA MITI

Na EMMANUEL MICHAEL SENNY, KIGOMA

Mkuu wa wilaya ya Buhigwe mkoani Kigoma, Kanal Marko Ngayalina pamoja na  na kamati ya ulinzi na usalama, wameungana na  wananchi wa kijiji cha Kasumo kata ya Kajana wilayani humo kupanda miti elfu 1000 katika vyanzo vya maji ili kuimalisha upatikanaji wa maji Safi na salama katika vyanzo hivyo.

Akizungumza na wananchi wa kijiji cha Kasumo mara baada ya zoezi la upandaji wa miti Kanal Ngayalina aliwataka wananchi kutunza vyanzo vya maji ili waendelee kunufaika na huduma ya maji kijijini humo. 

"Miti hii itasaidia kulinda vyanzo hivi ambapo wananchi hamtakuwa mkipata shida ya maji kutokana na kukauka kwa vyanzo hivi, cha msingi ni  kuitunza miti hii " alisema Ngayalina.

Aidha Mwenyekiti wa serikali ya kijiji cha Kasumo Damasi Gaburiel alisema wananchi wamekuwa wakihangaika kwa mda mrefu kutafuta maji, na kwamba hatua hiyo itakuwa suluhisho la tatizo la maji kwa wananchi.

Nao baadhi ya wananchi wa kijiji hicho walimpongeza mkuu wa Wilaya kwa namna ambavyo  aliwahamasisha kupanda miti ili kumaliza tatizo la maji kwa wananchi.

"Ni jambo la kujivunia kwa kiongozi wetu kuja kushirikiana na wananchi wake katika shughuli za maendeleo, na hapa ni sisi wananchi ndio tunanufaika kitakapofika kipindi Cha mito kukauka hatutakuwa na hofu kutokana na miti tuliyopanda" walisema wananchi hao. 

Mradi wa maji katika kijiji cha Kasumo umeghali zaidi ya milioni 306 ikiwa ni hatua ya pili ya kuimarisha mradi wa kijiji na wananchi kuendelea kupata maji safi na salama pamoja na kumtua mama ndoo kichwani.

Mwisho.