MHE HASUNGA, MHE KAKUNDA NA DKT TULIA WAUNGANA KUTATUA CHANGAMOTO YA WAFANYABIASHARA WA VIAZI MVIRINGO MKOANI MBEYA

Waziri wa Kilimo Mhe Japhet Hasunga (Kushoto), Waziri wa Viwanda na Biashara Mhe Joseph Kakunda (Katikati) pamoja na Naibu Spika wa Bunge la Jamhuri ya Muungano wa Tanzania Dkt Tulia Jackson Mwansasu wakiwa katika picha ya pamoja mara baada ya kutatua kero za wakulima na wafanya biashara wa Viazi Mviringo katika eneo la Uyole Jijini Mbeya leo tarehe 30 Aprili 2019. (Picha Zote Na Mathias Canal, Wizara ya Kilimo)

Waziri wa Kilimo Mhe Japhet Hasunga (Kushoto), Waziri wa Viwanda na Biashara Mhe Joseph Kakunda (Katikati) pamoja na Naibu Spika wa Bunge la Jamhuri ya Muungano wa Tanzania Dkt Tulia Jackson Mwansasu wakiwa katika mkutano wa utatuzi wa kero za wakulima na wafanya biashara wa Viazi Mviringo katika eneo la Uyole Jijini Mbeya leo tarehe 30 Aprili 2019.

Sehemu ya wakulima na wafanya biashara wa Viazi Mviringo katika eneo la Uyole Jijini Mbeya wakifatilia mkutano wa utatuzi wa kero za zao hilo leo tarehe 30 Aprili 2019.

Na Mathias Canal, Wizara ya Kilimo-Mbeya

Waziri wa Kilimo Mhe Japhet Hasunga (Mb), Waziri wa Viwanda na Biashara Mhe Joseph Kakunda pamoja na Naibu Spika wa Bunge la Jamhuri ya Muungano wa Tanzania Dkt Tulia Jackson wameungana kutatua kadhia za zilizokuwa zinawakumba wakulima na wafanyabiashara wa viazi mviringo Mkoani Mbeya.

Viongozi hao wamevalia njuga kadhia za wakulima na wafanyabiashara wa viazi mviringo ambazo kwa muda mrefu zimekuwa zikiwasumbua wafanyabiashara hao.

Wakizungumza Leo tarehe 30 Aprili 2019 mbele ya viongozi hao wakulima hao  katika mkutano uliofanyika katika eneo la Uyole Jijini Mbeya, wakulima hao waliiomba serikali kutatua changamoto ambazo kwa muda mrefu zimekuwa kero bila kupatiwa majibu.

Kero zinazowakabili wakulima wa viazi mviringo ni pamoja na faini zisizo rafiki za vifungashio, Ufungaji wa mifuko (zipu) wakati wa kusafirisha usumbufu wa mawakala wa kilimo wakati wa kusafirisha viazi pamoja na sheria ya vipimo kutokuwa rafiki kwani viazi hutofautiana uzito kutokana na msimu.

Waziri wa Viwanda na Biashara Mhe Japhet Kakunda (Mb) amepiga marufuku faini ambazo ni kinyume na taratibu za nchi sambamba na kuzuia utozaji faini kwa wafanyabiashara hao kwa gunia badala yake amesema utawekwa utaratibu wa kutoza faini kwa kilo ili kuepuka wizi na rushwa.

Kero nyingine ni pamoja na Rushwa kwa baadhi ya watumishi wa viwango hususani katika vituo wakati wa kupima katika vituo vya ukaguzi visivyo rasmi vilivyopo katika eneo la Makambako, Iringa, Morogoro, Mikese na Kibaha.

Mhe Hasunga alisema kuwa serikali ya awamu ya tano inayoongozwa na Mhe Rais Dkt John Pombe Magufuli imedhamiria kwa dhati kutatua kero zisizo rafiki kwa wakulima na watanzania wote.

“Kumekuwa na malalamiko ya muda mrefu sasa kwenye zao hili muhimu la viazi mviringo ndio maana Leo tumeambatana na Waziri wa Viwanda ili kupata ufumbuzi wa kadhia hizo" Alikaririwa Mhe Hasunga

Kadhalika, aliwaeleza wakulima hao waliojitokeza katika mkutano huo kuwa Wizara yake imejipanga kuhakikisha kuwa wakulima wote nchini wanasajiliwa ili kubaini kiwango cha mashamba wanayolima na uwezo wa uzalishaji wa mazao.

Vilevile alieleza kuwa serikali imeanza mkakati wa kuwa na Bima ya mazao kwani kufanya hivyo wakulima watakuwa na ahueni pindi yanapotokea majanga katika mazao wanayolima.

Naye Naibu Spika wa Bunge la Jamhuri ya Muungano wa Tanzania Mhe Dkt Tulia Ackson amewapongeza wakulima hao wa viazi mviringo kwa kuwa wavumilivu wakati serikali inatafuta ufumbuzi wa kadhia hizo zinazowakabili.

Alisema kuwa wizara ya Kilimo kwa kushirikiana na Wizara ya Viwanda na Biashara zimekutana kutatua kadhia hizo ili wakulima mkoani Mbeya na mikoa mingine nchini waweze kuzalisha na kusafirisha mazao yao pasina kadhia yoyote.

Pamoja na mambo mengine amewashukuru viongozi hao kwa pamoja kwa kukubali na kuzipatia ufumbuzi kadhia hizo, huku akiahidi kwa ushirikiano wake pamoja na wakulima hao kutaanzishwa umoja wa kudumu ili kupata ufumbuzi wa changamoto zingine katika kilimo na viwanda.

MWISHO