MATOKEO YA UTAFITI YAWAFIKIE WALENGWA-DKT TIZEBA

Waziri wa kilimo Mhe Dkt Charles Tizeba akisisitiza jambo wakati wa hafla ya uzinduzi wa Bodi ya Taasisi ya Utafiti wa kilimo Tanzania iliyofanyika TARI-SERIAN Jijini Arusha leo tarehe 21 Julai 2018. (Picha Zote Na Mathias Canal-WK)

Baadhi ya watafiti kutoka vituo mbalimbali vya utafiti Tanzania-TARI wakifatilia kwa makini hotuba ya Waziri wa kilimo Mhe Dkt Charles Tizeba wakati wa hafla ya uzinduzi wa Bodi ya Taasisi ya Utafiti wa kilimo Tanzania iliyofanyika TARI-SERIAN Jijini Arusha leo tarehe 21 Julai 2018.

Waziri wa kilimo Mhe Dkt Charles Tizeba akikata utepe kuzindua Bodi ya Taasisi ya Utafiti wa kilimo Tanzania iliyofanyika TARI-SERIAN Jijini Arusha leo tarehe 21 Julai 2018. Wengine ni Mwenyekiti wa Bodi ya wakurugenzi TARI Dky Yohana Budeba (Katikati) na Katibu Mkuu wa Wizara ya kilimo Mhandisi Mathew Mtigumwe.

Waziri wa kilimo Mhe Dkt Charles Tizeba akizungumza na watafiti wakati wa hafla ya uzinduzi wa Bodi ya Taasisi ya Utafiti wa kilimo Tanzania iliyofanyika TARI-SERIAN Jijini Arusha leo tarehe 21 Julai 2018.

Waziri wa kilimo Mhe Dkt Charles Tizeba akimkabidhi Mwenyekiti wa Bodi ya wakurugenzi TARI Dkt Yohana Budeba vitabu vya sheria ya kuanzisha TARI wakati wa hafla ya uzinduzi wa Bodi ya Taasisi ya Utafiti wa kilimo Tanzania iliyofanyika TARI-SERIAN Jijini Arusha leo tarehe 21 Julai 2018.

Na Mathias Canal-WK, Arusha

Waziri wa kilimo Mhe Dkt Charles Tizeba amewapongeza watafiti wa kilimo kote nchini na kuwataka kutoa matokeo ya tafiti wanazozifanya kwa muktadha wa kujibu mahitaji ya wakulima, wafanyabiashara na jamii kwa ujumla.

Alisisitiza kuwa utafiti ni suala la msingi katika maendeleo ya Taifa kwa kuwezesha uimarishaji wa mnyororo wa thamani kwani utafiti ukijibu hoja za wakulima sekta hiyo itaimarika zaidi na hivyo kuongeza tija katika uzalishaji wa mazao mbalimbali nchini.

Dkt Tizeba ameyasema hayo leo tarehe 21 Julai 2018 wakati wa hafla ya uzinduzi wa Bodi ya Taasisi ya Utafiti wa kilimo Tanzania iliyofanyika TARI-SERIAN Jijini Arusha.

Alisema kuwa nchini Tanzania sekta ya kilimo inachangia asilimia 30% ya pato la Taifa na kutoa ajira kwa zaidi ya asilimia 65% mpaka asilimia 70% hivyo watafiti hao wanapaswa kuongeza tija katika ufanisi wa utafiti wao ili kuwanufaisha wakulima.

Halikadhalika ameeleza kuridhishwa kwake na kazi zinazofanywa na watafiti nchini na kutumia fursa hiyo kuwapongeza kwa kazi nzuri waifanyayo ambayo imechangia kuongeza tija katika kilimo,“Pamoja na kuwapongeza lakini mnapaswa kutambua kuwa Wizara ya kilimo ndiyo inaongoza kwa kuwa na wasomi wengi lakini bado changamoto ya kubadili mtazamo kwa wakulima ili kuzalisha mazao yao kupitia mbinu bora za kilimo cha kisasa” Alisema

Alisema kuwa lengo la Serikali ya Jamhuri ya Muungano wa Tanzania ni kuona wakulima wanaishi maisha bora na wanachangia katika suala zima la kuwa na maisha bora hivyo endapo kama watafiti watawajibika ipasavyo sekta ya kilimo itakuwa zaidi na kabla ya mwaka 2025 Tanzania itafikia uchumi wa kati.

Wakati huo huo waziri huyo wa kilimo, ameagiza idara ya uhawilishaji wa teknolojia na mahusiano katika Taasisi ya Utafiti wa kilimo Tanzania (TARI) kuongeza tija katika kuzitangaza mbegu mbalimbali zinazozalishwa na TARI ikiwemo mbegu ya Mahindi Lishe aina ya HK1 ambayo ina mwaka wa tisa mpaka sasa tangu izalishwe ilihali wananchi hawaifahamu.

Aidha, amewasihi watafiti hao kutokuwa watafiti wa maandishi badala yake kuwa watafiti wa kuwanufaisha wananchi huku akiongeza kuwa taasisi za utafiti zinapaswa kufanya biashara ili ziweze kujiendesha na kupunguza mzigo wa tegemezi kwa serikali.

MWISHO