NAIBU WAZIRI WA MADINI AIPONGEZA KAMPUNI YA NYAMIGOGO KWA KUAJIRI WATANZANIA PEKEE

Naibu Waziri wa Madini Mhe Doto Mashaka Biteko (wa pili kulia) akiongozana na Mkurugenzi wa Kampuni ya wazawa ya uchenjuaji dhahabu kwa kutumia mabaki ya mchanga wa dhahabu (MARUDIO) ya Nyamigogo Grand Vezir Holdings Ltd (Hussein Nassoro Amari Kasu (Mb) (wa pili kushoto) katika ukaguzi wa mitambo ya kazi, Jana 6 Machi 2018. Picha zote na Mathias Canal-Wazo Huru Blog

Ukaguzi wa mitambo

Ukaguzi wa mitambo

Naibu waziri wa madini akikagua mitambo mitambo ya Kampuni ya wazawa ya uchenjuaji dhahabu kwa kutumia mabaki ya mchanga wa dhahabu (MARUDIO) ya Nyamigogo Grand Vezir Holdings Ltd, akiwa katika ziara ya kikazi Wilaya ya Nyang'wale Mkoani Geita. Jana 6 Machi 2018

Na Mathias Canal, Geita 

Naibu Waziri wa Madini Mhe Doto Mashaka Biteko ameipongeza Kampuni ya wazawa ya uchenjuaji dhahabu kwa kutumia mabaki ya mchanga wa dhahabu (MARUDIO) ya Nyamigogo Grand Vezir Holdings Ltd inayomilikiwa na Hussein Nassoro Amari Kasu (Mb) kwa uwekezaji mkubwa iliyoufanya nchini na kuwanufaisha watanzania wengi.

Mhe Biteko ametoa pongezi hizo jana 6 Machi 2018 wakati akizungumza na uongozi wa kampuni hiyo akiwa katika ziara ya siku moja ya kikazi Wilaya ya Nyang'wale Mkoani Geita ambapo pamoja na mambo mengine anatembelea maeneo ya Wachimbaji wadogo ili kubaini changamoto zinazowakabili na kuzitafutia ufumbuzi.

Alisema kuwa ni fahari kwa nchi kuwa na wawekezaji wazawa ambao wanalipa kodi za serikali kwa ufasaha sambamba na kutoa ajira kubwa kwa watanzania nchini jambo ambalo linaakisi na kuunga mkono juhudi za serikali ya awamu ya tano inayoongozwa na Rais wa Jamhuri Wa Tanzania Mhe. Dkt John Pombe Magufuli.

Kampuni hiyo ambayo huchukua mchanga huo wa madini katika maeneo mbalimbali nchini zinapofanyika shughuli za kuosha na kuchimba mchanga wa Madini wa dhahabu imeajiri wafanyakazi wote ambao ni watanzania takribani 60.

Mhe Biteko pia amewataka wafanyakazi wote katika kampuni hiyo kuwa wazalendo na kufanya kazi kwa bidii na weledi mkubwa bila kuingiza Mashaka yoyote kwa mmiliki wa kampuni hiyo.

Sambamba na hayo pia Mhe Biteko ameipongeza kampuni hiyo kwa kuchangia shughuli Mbalimbali za maendeleo ikiwemo ujenzi wa zahanati, ujenzi wa madarasa, Ofisi ya kijiji, ufungaji wa pampu ya maji, pamoja na kutoa mizinga 120 ya nyuki.

Sambamba na hayo kampuni hiyo imeomba kupatiwa ufumbuzi baadhi ya changamoto ikiwemo kupatiwa maeneo ya kuchimba ili kupata mawe ya kutosha ili kuwaongezea nguvu katika kuyafikia malengo ya serikali inayoongozwa na Chama Cha Mapinduzi (CCM) katika kutekeleza kauli mbiu ya Tanzania ya viwanda.

Pia kampuni hiyo imeomba serikali kupatiwa ufumbuzi kwa kuboresha miundombinu ili kurahisisha kupitisha malighafi kwa kuzifikisha kiwandani, kusogeza huduma za maji, sambamba na kusogeza huduma za umeme ili kuongeza ufanisi katika kazi ya uzalishaji.

Naibu Waziri wa Madini Mhe Doto Mashaka Biteko (Mb) ameutaka uongozi wa kampuni hiyo ya wazawa ya uchenjuaji dhahabu kwa kutumia mabaki ya mchanga wa dhahabu (MARUDIO) ya Nyamigogo Grand Vezir Holdings Ltd kuwa wavumilivu katika kipindi hiki ambacho Rais Magufuli anakabiliana na wanyonyaji wa rasilimali za Taifa na pindi atakapokamilisha juhudi za kuimarisha uchumi, huduma zote zitapatikana ili kuboresha uwekezaji na maisha ya wananchi kwa ujumla wake.

MWISHO.