WAZIRI MKUU AWATAKA MABALOZI KUVUTIA UWEKEZAJI

 

Waziri Mkuu, Kassim Majaliwa akizungumza na Mabalozi wa Tanzania nchini Brazil, Comoro, Jamhuri ya Kidemokrasia ya Congo, Israel, Kuwait na Urusi, ofisini kwa Waziri Mkuu, Mlimwa jijini Dodoma, Januari 17, 2022.

Waziri Mkuu, Kassim Majaliwa akiwa katika picha ya pamoja na Mabalozi wa Tanzania katika baadhi ya nchi baada ya kuzungumza nao, ofisini kwa Waziri Mkuu, Mlimwa jijini Dodoma, Januari 17, 2022. Kutoka kushoto ni Balozi Said Juma Mshana (DRC), Balozi Profesa Adelardus Kilangi (Brazil), Balozi Said Shaib  Mussa (Kuwait), Balozi Fredrick Ibrahim Kibuta (Urusi) na Balozi Alex Gabriel  Kalua (Israel). 

(Picha na Picha na Ofisi ya Waziri Mkuu)

WAZIRI MKUU Kassim Majaliwa amewataka mabalozi wanaoiwakilisha Tanzania katika mataifa mbalimbali watoe msukumo Katika utekelezaji wa diplomasia ya uchumi kwa kuhamasisha uwekezaji zaidi, kuimarisha biashara pamoja na kutafuta masoko ya bidhaa zinazozalishwa nchini katika maeneo yao ya uwakilishi.

Pia, Mheshimiwa Majaliwa amewasisitiza mabalozi hao kuhakikisha wanalinda taswira ya Tanzania katika nchi za uwakilishi sambamba na kujielekeza katika kuvutia watalii na kuwasaidia wafanyabiashara wa Kitanzania kufanya biashara nje.

Waziri Mkuu amekutana na mabalozi hao leo (Jumatatu, Januari 17, 2022) ofisini kwake Mlimwa jijini Dodoma. Mabalozi aliyokutana nao ni Balozi Profesa Adelardus Kilangi (Brazil), Balozi Said Juma Mshana (DR-Congo), Balozi Alex Gabriel Kalua (Israel), Balozi Said Shaib Mussa (Kuwait) na Balozi Fredrick Ibrahim Kibuta (Urusi).

Kadhalika, Mheshimiwa Majaliwa amewataka mabalozi hao wahakikishe wanakwenda kupunguza gharama za uendeshaji wa balozi kwa kubana matumizi hususani katika mambo yasiyokuwa ya lazima. “Pia mkaimarishe mahusiano kati yenu na maafisa wa ubalozi.”

Pia, Waziri Mkuu amewataka mabalozi hao wakutane na Watanzania waishio nje ya nchi (Diaspora) na wawasaidie kuimarisha Jumuiya zao kwa kuwa na uongozi imara. “Waunganisheni ili nao washiriki kwenye ujenzi wa uchumi wa viwanda na kwenye shughuli za kijamii mnazozifanya huko.”

Waziri Mkuu amesema mabalozi hao wanatakiwa kuitangaza sana lugha ya Kiswahili. “Naamini mkitumia ushawishi wenu katika kukitangaza Kiswahili kinaweza kuwa chanzo cha ajira kwa Watanzania nje hususan kwa walimu wa fani hiyo sambamba na kuitangaza nchi yetu.”

Akizungumza kwa niaba ya mabalozi wenzake, Balozi wa Tanzania nchini Brazil, Balozi Kilangi ametumia fursa hiyo kumshukuru Waziri Mkuu kwa kukutana nao na ameahidi kwamba hawatamuangusha Mheshimiwa Rais Samia Suluhu Hassan na Serikali yake na kwamba watahakikisha wanakwenda kutekeleza maelekezo yote kwa manufaa ya Taifa.