MGALU AWASHA UMEME KATA ZA LUGOBA, MANDELA, PWANI

Na Rhoda James, Pwani

Naibu Waziri wa Nishati, Subira Mgalu amezindua rasmi upatikanaji wa huduma ya umeme katika Kijiji cha Saleni Kata ya Lugoba na kijiji cha Hondogo Kata ya Mandela mkoa wa Pwani.

Uzinduzi huo ulifanyika tarehe 3 Mei, 2018 katika vijiji hivyo wakati alipofanya ziara ya kukagua Mradi wa Ujazilizi (Densification) na miradi mengine ya umeme inayotekelezwa mkoani humo na Wakala wa Nishati Vijijini (REA) kwa kushirikiana na Shirika la Umeme Tanzania (TANESCO).

Katika ziara hiyo Naibu Waziri Mgalu aliwaagiza watumishi wa TANESCO na REA kuhakikisha wanaunganishia wananchi wote umeme kwa wakati ili wananchi wafaidike nishati hiyo kwa maendeleo ya kiuchumi.

Pia aliwataka wananchi wa Pwani kuchangamkia fursa ya mradi huo pindi  umeme unapofika katika kata zao.

“Fanyeni wiring haraka katika Zahanati na Mashuleni pia katika nyumba zenu ili muunganishiwe umeme wa REA kwa gharama ya shilingi 27,000 tu,” alisema Mgalu.

Mgalu alisema kuwa tayari Kaya 65 katika Kata ya Mandela zimeunganishwa na umeme na kaya nyingine 85 zimeongezwa kwa ajili ya utekelezaji.

Aliongeza kuwa, ifikapo mwaka 2021 vijiji vyote nchini vitakuwa vimepata umeme kwa kuwa tayari Wakandarasi wote wamekwisha idhinishiwa malipo yao na hivyo kuwataka ambao wameondoka katika maeneo yao kurudi haraka.

Kwa upande wake, Diwani wa Kata ya Lugoba Rehema Issa, alisema kuwa wananchi walichelewa wenyewe kufanya wiring kutokana na sababu mbalimbali lakini sasa watafanya haraka.

“Pia tulikuwa na tatizo la transforma lakini sasa tumewekewa na wananchi wangu watapata umeme,”alisema Issa.

Aidha, Diwani Issa alisema yapo baadhi ya maeneo ambayo hayajapata umeme hivyo alitumia fursa hiyo kumuomba Naibu Waziri Mgalu asaidie ili vijiji vipate umeme kwa wakati.

Kwa nyakati tofauti, Mbunge wa Jimbo la Chalize Riziwani Kikwete alimshukuru Naibu Waziri Mgalu kwa kutembelea jimbo lake na kwa kasi kubwa ya kuhakiksha wananchi wote wa Pwani wanapata umeme kwa wakati.