TAMISEMI YAKUSUDIA KUBORESHA ELIMU YA WATOTO WENYE MAHITAJI MAALUMU

 Naibu Katibu Mkuu (ELIMU) Ofisi ya Rais TAMISEMI, Tixon  Nzunda akifungua mafunzo kwa walimu wa shule zenye  wanafunzi wenye mahitaji maalumu  , Maofisa wa Ustawi wa Jamii na  Maofisa Elimu Maalum ngazi za wilaya na Mikoa yote ya Tanzania Bara mjini Morogoro jana. 

 Baadhi ya Washiriki wa Mafunzo ambao ni walimu wa shule zenye  wanafunzi wenye mahitaji maalumu  , Maofisa wa Ustawi wa Jamii na  Maofisa Elimu Maalum ngazi za wilaya na Mikoa yote ya Tanzania Bara wakifuatilia hotuba ya mgeni rasmi wakati wa ufunguzi wa mafunzo mjini Morogoro  jana.

Paulina Mkwama, Kaimu Mkurugenzi Idara ya Elimu Ofisi ya Rais TAMISEMI, akitoa maelezo ya awali wakati wa ufunguzi wa  mafunzo kwa walimu wa shule zenye  wanafunzi wenye mahitaji maalumu  , Maofisa wa Ustawi wa Jamii na  Maofisa Elimu Maalum ngazi za wilaya na Mikoa yote ya Tanzania Bara mjini Morogoro jana. 

Na Fred J. Kibano

Naibu Katibu Mkuu Ofisi ya Rais TAMISEMI anayeshughulikia Elimu, Tixon  Nzunda amefungua mafunzo kwa walimu wa shule zenye  wanafunzi wenye mahitaji maalumu,Maofisa wa Ustawi wa Jamii na  Maofisa Elimu Maalum ngazi za wilaya na Mikoa yote ya Tanzania Bara.

Akifungua mafunzo hayo ya siku sita mjini Morogoro, Nzunda amesema Ofisi ya Rais TAMISEMI imepanga kufanya  zoezi  maalumu la kuwatambua watoto wenye ulemavu wa aina tofauti  ili watabuliwe  kwa ajili ya kupata afua sahihi na mahitaji maalumu  ya kielimu  mashuleni.

Amesema mafunzo   hayo maalum  yamelenga kuwapatia mbinu mbalimbali za kuwatambua na kuwafichua watoto wenye mahitaji maalumu ili nao wapatiwe fursa ya elimu kama watoto wengine.

Aidha, alisema Serikali ya Awamu ya Tano imeamua kutoa Elimu  Bila Malipo  na bila vikwanzo vyovyote,  lakini pia kwa kutumia fursa hiyo, Serikali kwa kupitia Ofisi ya Rais TAMISEMI itaendesha zoezi la muda wa  siku 21 katika mikoa yote ya Tanzania Bara  kwa ajili ya  kuwatambua watoto wenye mahitaji maalumu kulingana na ulemavu walio nao ili wapate elimu.

Nzunda alisema kuwa zaidi ya shilingi bilioni moja zimetengwa kwa ajili ya  utekelezaji wa zoezi la utambuzi wa watoto hao na kuwataka  washiriki wa mafunzo hayo  kuwa waadilifu mkubwa ,wawajibikaji , wasikivu  kwa walezi na wazazi wa watoto hao , na walimu wa shule husika ili  kupata takiwmu sahihi ya aina ya ulemavu  na mahitaji yao.

Paulina Mkwama, Kaimu Mkurugenzi Idara ya Elimu Ofisi ya Rais TAMISEMI,  alisema Serikali chini ya Ofisi ya Rais TAMISEMI imekusudia kuendesha zoezi la kuwatambua watoto wenye mahitaji maalumu ili kupata afua sahihi na mahitaji  ya kielimu  na uhitaji unaoongezeka kwa kundi hilo   nchini.

Mkwama alisema, tangu mwaka 1998 Serikali iliporidhia matamko ya kimataifa ya Elimu Jumuishi (Inclusive Education) hakukuwepo utaratibu maalum wa kuwabaini watoto wenye mahitaji maalumu na hivyo kupelekea kundi hilo la watoto kutopata elimu inayostahili kwa kuzingatia afua sahihi ya aina ya ulemavu walionao.

Mkwama  alisema , miongoni mwa watoto wenye mahitaji maalumu  ambao wanatakiwa kutambuliwa ni wenye ulemavu   wa viungo, walemavu wa ngozi, wenye mtindo wa ubongo, wasioona, uoni hafifu , viziwi ,  wasioweza kuongea na wenye usonji.

Aidha, Mkwama alisema, kuwepo kwa vitendo vya wazazi kuwaficha watoto wenye matatizo ya akili na usonji ni miongoni mwa sababu  ya watoto hao kukosa haki ya msingi ya kupata  elimu bora na kuwapelekea kuishi kwenye mazingira magumu.

Utambuzi huo utafanyika katika ngazi ya shule na kwenye jamii ili kuwaibua watoto wenye mahitaji maalumu kuanzia miaka minne na zaidi waliofichwa ili waibuliwe na kuweza kupatiwa elimu inayohitahiki kwao.

Pia takwimu zitakazoandaliwa zitawasilishwa katika mamlaka  za juu ili zifanyiwe kazi ya uchambuzi  wa mahitaji halisi.