Mwigulu azitwisha ‘zigo’ asasi za dini

WAZIRI wa Mambo ya Ndani ya Nchi, Mwigulu Nchemba (pichani) amesema mauaji na uhalifu mkubwa, unaoendelea hapa nchini ni matokeo ya kukosekana kwa misingi mizuri ya malezi kwa vijana, yenye kuzingatia maadili ya dini na sasa amezitwisha ‘zigo’ asasi za kidini kusaidia kudhibiti matukio hayo.

Mwigulu ambaye wizara yake ndiyo inayosimamia masuala ya ulinzi na usalama wa raia na mali zao, alisema hayo juzi usiku kwenye Harambee ya Kuchangia Fedha Kusaidia Ushirika wa Kiinjili wa Wanafunzi Wakristu Vyuo Vikuu Tanzania (TAFES).

Akiwa mgeni rasmi katika hafla hiyo, Mwigulu aliweka wazi kuwa matukio ya watu kuuawa, kutekwa, kuibiwa, kushambuliwa na kila aina ya uhalifu unaoendelea nchini, chimbuko lake ni kukosekana kwa misingi mizuri ya makuzi kwa vijana yenye hofu ya Mungu.

Alisema iwapo wazazi, walezi na viongozi wa dini, wakizingatia malezi ya vijana katika misingi ya kidini, matukio hayo yatapungua kama sio kuisha kabisa. "Serikali inatambua nafasi ya dini katika kuwalea vema vijana watakaokuja kusaidia jamii na kuinua uchumi wa nchi, elimu ya dini ndiyo njia pekee ya kukabiliana na uhalifu nchini," alisema.

Aliongeza; "Matukio ya uhalifu yanayoendelea nchini kwa sasa kwa asilimia kubwa yanasababishwa na uwepo wa vijana wasio na malezi yenye misingi ya kidini ambayo kimsingi ingewafanya kuwa na hofu ya Mungu na kujikuta wakiepuka kutenda uhalifu, hivyo TAFES ni jukumu lenu kuwajenga vijana tangu kwenye ngazi za vyuo." 

Alisema, ili nchi isonge mbele ni lazima viongozi waandaliwe tangu ngazi za vyuo vikuu, wanaposoma ili hatimaye waje kusaidia kusukuma gurudumu la maendeleo ya nchi. 

"Najua mtoto anajengewa misingi ya kuongoza tangu akiwa shule ya msingi, pindi akijiunga na elimu ya chuo hapati tabu kwa kuwa anakuwa tayari anajua kile anachotaka kuja kufanya maishani, sasa hapo ndio muda muafaka wa kulelewa kwenye misingi ya dini, hiyo itasaidia wingi wa wasomi wenye hofu ya Mungu watakaosaidia taifa," alisema Mwigulu.

Pia Waziri Mwigulu alionesha kusikitishwa na watu ambao wanapinga jitihada za Rais John Magufuli za kukabiliana na rushwa na kila aina ya ufisadi nchini na kusema kuwa watu hao ni si adui tu kwa nchi, bali hata kwa vizazi vijavyo. 

Alisema viongozi waadilifu kama Rais Magufuli, si tu muhimu kwa kizazi cha sasa, ila pia kwa vizazi vijavyo, hasa ikizingatiwa kuwa anaandaa misingi ya taifa la vizazi vya sasa na baadaye.