KUTOZINGATIWA KWA KALENDA YA UZALISHAJI NI MIONGONI MWA CHANGAMOTO KWENYE ZAO LA TUMBAKU-EMMANUEL CHEREHANI

 Mwenyekiti wa umoja wa Vyama vikuu vya wakulima wa Tumbaku Tanzania (TCJE) Ndg Emmanuel Cherehani akisisitiza jambo wakati akiwasilisha risala ya wakulima mbele ya Mgeni rasmi ambaye ni Waziri wa Kilimo Mhe Japhet Hasunga (Mb) kwenye hafla ya uzinduzi wa msimu wa zao la Tumbaku mwaka 2019 Wilayani Urambo Mkoa wa Tabora, leo Tarehe 13 Mei 2019. (Picha Na Mathias Canal, Wizara ya Kilimo)

Waziri wa Kilimo Mhe Japhet Hasunga (Katikati) akizungumza na Mkurugenzi wa Uzalishaji wa kampuni ya Alliance One Ndg David Mayunga (Kulia) sambamba na Mwenyekiti wa umoja wa Vyama vikuu vya wakulima wa Tumbaku Tanzania (TCJE) Ndg Emmanuel Cherehani mara baada ya mkutano wa wadau wa wa sekta ya Tumbaku katika hafla ya ufunguzi wa msimu wa masoko ya Tumbaku mwaka 2019 iliyofanyika katika maghala ya kampuni ya Alliance One Wilaya ya Urambo mkoani Tabora, leo Tarehe 13 Mei 2019. 

Na Mathias Canal, Wizara ya Kilimo-Tabora

Kutoazingatiwa kwa kalenda ya uzalishaji ya zao la tumbaku ni miongoni mwa ucheleweshaji wa uagizaji wa pembejeo za zao la Tumbaku, Kupungua kwa mahitaji ya tumbaku na kushuka kwa bei ya tumbaku kwa kila mwaka ni miongoni mwa mambo yanayowasababishia wakulima hasara.

Hayo yameelezwa leo tarehe 13 Mei 2019 na Mwenyekiti wa umoja wa Vyama vikuu vya wakulima wa Tumbaku Tanzania (TCJE) Ndg Emmanuel Cherehani wakati akiwasilisha risala ya wakulima mbele ya Mgeni rasmi ambaye ni Waziri wa Kilimo Mhe Japhet Hasunga (Mb) kwenye hafla ya uzinduzi wa msimu wa zao la Tumbaku mwaka 2019 Wilayani Urambo Mkoa wa Tabora.

Cherehani alisema kuwa Makampuni ya ununuzi wa tumbaku yamekuwa yakipunguza mahitaji yao mwaka hadi mwaka kutoka uzalishaji wa kilo 100,000,000 na kufikia uzalishaji wa mkataba ni kilo 54,000,000 tu katika msimu wa mwaka 2018/2019  na matarajio ya msimu ujao wa 2019/2020 ni kilo 43,000,000 baada ya kampuni moja ya ununuzi wa tumbaku kutoonesha nia ya kuendelea na biashara ya tumbaku nchini.

Alisema, kushuka kwa mahitaji ya wanunuzi kumekuwa kukiendana na kushuka kwa bei ya wastani ya kuuzia tumbaku mwaka hadi mwaka, ambapo iliwahi kufikia bei ya wastani wa USD 2.4 lakini mpaka sasa kwa masoko yaliyofunguliwa wastani ni USD 1.72 na sura iliyopo kwa wanunuzi haioneshi kupanda kwa bei kwa msimu ujao.

Muwakilishi huyo wa wakulima wa Tumabku nchini aliongeza kuwa kwa msimu wa 2017/2018 baadhi ya makampuni yameshindwa kulipa ushuru wa vyama vya msingi na vyama vikuu vya ushirika kwa baadhi ya maeneo kutokana na madai ya makampuni kutokuwa na uwezo kutokana na madai yao ya muda mrefu ya marejesho ya kodi ya ongezeko la thamani (VAT Returns).

Cherehani amemuhakikishia Waziri Hasunga kuwa kwa muda mrefu wakulima hao wamekuwa na mkakati wa kuanzisha kiwanda cha kusindika tumbaku ili kuongeza thamani ya zao hilo kwa mkulima na kumuongezea kipato. “Kupitia mradi wa Pamoja wa wakulima wa tumbaku nchini tumeazimia kuanza upembuzi yakinifu juu ya ujenzi wa kiwanda cha tumbaku Wilayani Urambo” Alisisitiza

Alisema kuwa kwa kushirikiana na wanunuzi wa zao la tumbaku vyama vikuu vimeendelea kusimamia utekelezaji wa mipango mbalimbali ambayo inaendana na vigezo vya uzalishaji wa zao la tumbaku ikiwepo utunzaji wa mazingira kwa kupanda miti na Uboreshaji wa mabani ya kisasa yenye kutumia kuni chache ambapo kupitia Vyama vya ushirika kwa msimu wa 2019/2020 kila mkulima atakuwa ameboresha mabani kwa 100%.

“Pamoja na jitihada za utunzaji wa mazingira, kuna jitihada zinafanywa za kutafuta nishati mbadala kwa kutumia nishati ya mwanga, mabingobingo (Elephat grass) na pumba za mpunga kwa maeneo tofauti yanayolima tumbaku. Tunaomba utafiti huu upewe msukumo mkubwa ili kupunguza matumizi ya kuni” Alikaririwa Ndg Cherehani

Aidha, wakulima hao wa zao la tumbaku wamempongeza Rais wa Jamuhuri ya muungano wa Tanzania Mhe Dkt John Pombe Joseph Magufuli, Makamu wa Rais Mama Samia Suluhu Hassan na Waziri Mkuu Mhe Kasimu Majaliwa (Mb) kwa kutetea masilahi ya wakulima kupitia Vyama vya Ushirika.

MWISHO