KINYIKA FC YAPETA ROBO FAINALI KOMBE LA SPANEST

Robo Fainali ya Kombe la SPANEST Piga Vita Ujangili, Okoa Tembo imeendelea leo kwa michezo miwili iliyowakutanisha Kinyika FC dhidi ya Ilolompya huku Mboliboli FC ikicheza na Itunundu FC.

Mchezaji Hamis Mkosa wa Kinyika FC  emeendelea kutikisa nyavu za wapinzani wake kwa kuipatia timu yake ushindi wa 1-0 dhidi ya Ilolompya, bao lililofungwa katika Dk 18 katika mchezo uliovunja rekodi ya watazamaji.

Bao hilo linamfanya Mkosa na Emanuel Sade wa Mapogolo FC kuongoza katika ligi hiyo kwa kwa kuwa na magoli matano kila mmoja hadi sasa.

Katika mechi yao ya kwanza Sade aliweka rekodi katika hatua ya robo fainali ya michuano hiyo kwa kufunga magoli matatu pekee yake katika mechi ambayo timu yake ilicheza na Mahuninga jana.

Katika mechi nyingine iliyochezwa leo, Mboliboli na Itunundu wameshindwa kuonesha ubabe baada ya kulazimishana sare ya bila kufungana katika dakika 90 za mchezo.

Hatua hiyo ya robo fainali inaendelea kesho kwa mechi za kwanza za marudio zitakazoikutanisha  Idodi Vs Malizanga na Mapogolo Vs Mahuninga.

Mratibu wa SPANEST, Godwell Ole Meing’ataki amesema mshindi wa kwanza wa kombe hilo atapata seti moja ya jezi, mipira miwili, cheti, medali ya dhahabu, Sh Milioni moja taslimu na safari ya kutembelea Hifadhi ya Taifa ya Ruaha.

Mshindi wa pili atapata mpira mmoja, cheti, medali ya shaba, na fedha taslimu Sh 700,000 huku mshindi wa tatu akiondoka na mpira mmoja, cheti, medali na fedha taslimu Sh 500,000.

Amesema mshindi wa nne wa mashindano hayo atapata mpira mmoja, cheti, na fedha taslimu Sh 300,000 huku mfungaji bora akiondoka na mpira  mmoja na Sh 100,000 na muazuzi bora akiondoka na jezi na Sh 100,000.

Amesema ligi hiyo inayofanyika kwa mwaka wa nne sasa ilianzishwa na Spanest ambao ni Mradi wa Kuboresha Mtandano wa Maeneo Yaliyohifadhiwa Kusini mwa Tanzania ikilenga kuwahamasisha wananchi wa vijiji 24 vya tarafa hizo zinazopakana na hifadhi ya Taifa ya Ruaha kushiriki katika vita dhidi ya ujangili na kuokoa maisha ya Tembo.

“Wanachotakiwa kufanya wananchi hao ni kupiga namba ya simu ya bure 0800751212 na kufichua taarifa za kweli za ujangili, taarifa hizi huwa siri kwahiyo wananchi wasiogope kutoa taarifa hizo,” alisema.