KATAENI BIASHARA HARAMU YA USAFIRISHAJI WATOTO-DED UKEREWE

Mkurugenzi Mtendaji wa Halmashauri ya Ukerewe Bi Esther Chaula

Mkurugenzi Mtendaji wa Kiwohede Bi Justa Mwaituka

Valence Nkulanga afisa mradi kutoka TDH-NL akitoa mada

Jamii wilayani ukerewe Mkoani Mwanza imetakiwa kuacha tabia ya kuwatoa watoto wao kwenda kufanya kazi za majumbani badala yake wawape elimu ili waweze kutimiza ndoto zao kwani ndiyo msingi wa maisha yao ya baadae. 

Wito huo umetolewa Novemba 17  na Mkurugenzi mtendaji wa halmashauri hiyo Bi Esther Chaula katika hotuba yake ya ufunguzi wa awamu ya pili ya  mradi wa kupinga usafirishaji haramu wa watoto na uhamiaji usio salama kwa minajili ya kuwatumikisha kazi hatarishi unaotekelezwa wilayani humo na Shirika la KIWOHEDE kwa ufadhili wa terres des hommes-Netherlands (TDH-NL) 

Amesema kama jamii kila mmoja akitimiza wajibu wake ikiwa ni pamoja na kuchukizwa na vitendo vya usafirishwaji watoto ukimchukulia huyo mtoto anayefanyia vitendo hivyo kama mtoto wako inawezekana kabisa kumalizia tatizo hilo. 

"Mchukulie yule mzazi ambaye ni rahisi  kurubuniwa kirahisi kwamba nipe mtoto ebu jiangalie kwamba  yule mzazi ungekuwa ni wewe ndiyo  ukawa unarubuniwa wewe ili mtoto wako aende kufanyishwa kazi na kuteseka ungejisikiaje?  " alisema

Aidha, amewataka watendaji wa wilaya na mamlaka za serikali za mitaa kushirikiana na kiwohede katika kutekeleza awamu ya pili ya mradi huo  kwani wamekuwa wakifanya shughuli hizi kwa kuinua ustawi wa  jamii kwa kufuata misingi ya utekelezaji wa sera na afua zinazowekwa na  serikali.

Kwa upande wake Mkurugenzi Mtendaji wa Shirika la Kiwohede Bi  Justa Mwaituka ameishukuru ofisi ya Mkurugenzi kwa ushirikiano ambao wamekuwa wakiupata kila mara wakati wa utekelezaji wa majukumu yao.

“Kwanza niipongeze ofisi yako kwa namna ambavyo imekuwa ikitoa ushirikiano kwa maafisa wangu kila mara wanapokuja kwako kama unavyofahamu mradi huu una mashirikiano ya karibu na maafisa ustawi, maafisa maendeleo ya jamii, elimu, mipango na idara nyingine kwa kweli Kumekuwa na ushirikiano mkubwa” alisema

Aliongeza kuwa katika awamu ya kwanza ya mradi kwa kushirikiana na idara  Mbalimbali kama maendeleo ya jamii, dawati la jinsia na watoto pamoja na ustawi wa jamii  Wametoa ushauri nasaha,  wamefanikiwa kutengeneza mifumo ya upatikanaji wa huduma za afya kwa watoto,  wametoa mafunzo mbalimbali ya stadi za maisha,   wametoa misaada ya kisheria na kuwarejesha baadhi yao mashuleni kuendelea na masomo. 

Kwa upande wake mratibu wa mradi Amos Juma aliyataja mafanikio yaliyopatikana katika awamu ya kwanza ni pamoja na watoto 6477 kufikiwa kupitia vipindi vya mafunzo kupitia vilabu mashuleni na mitaani huku watoto 165 wakipewa ushauri wa  kisheria na ushauri nasaha pamoja na wazazi 200 kujengewa uwezo wa malezi bora. 

Afisa  mradi kutoka Tdh-NL Valence Nkulanga alisema shirika lao linaendelea na shughuli za kuhakikisha hakuna mtoto anayenyonywa huku wakiendelea kutoa ufadhili kwa shirika la kiwohede kuhakikisha wanafanikiwa kudhibiti biashara haramu ya usafirishaji watoto kupitia mradi huo. 

Mradi huo unafanyika katika vijiji 36 vilivyopo katika Kata  8 ukitekelezwa na Shirika la kiwohede kupitia ufadhili kutoka shirika la kimataifa la terres des hommes  - Netherlands(Tdh-Nl) 

Uzinduzi huo wa awamu ya pili ya mradi umefanyika wilayani ukerewe na kuhudhuriwa na viongozi mbali mbali wilayani humo akiwemo Mkurugenzi mtendaji wa halmashauri (Alikuwa mgeni rasmi) ,  maafisa maendeleo, maafisa elimu, mkuu wa polisi  dawati la jinsia na watoto, viongozi wa dini, viongozi wa serikali ngazi ya kata na vijiji, walimu wa shule, waandishi wa habari na maafisa wa kiwohede.