BASHUNGWA AIAGIZA TUME YA USHIRIKA KUSIMAMIA ZOEZI LA ULIPAJI WA FEDHA ZA MADAI YA WATUMISHI WA SHIRECU

Makamu wa Rais wa Jamhuri ya Muungano wa Tanzania Mhe Mama Samia Suluhu Hassan akisalimiana na Naibu Waziri wa Kilimo Mhe Innocent Bashungwa (Mb) mara baada ya kutembelea Ofisi za Bodi ya Pamba ili kukagua maabara ya Pamba wakati akiwa katika ziara ya kikazi mkoani Shinyanga, Leo Tarehe 27 Februari 2019. (Picha Zote Na Mathias Canal, Wizara ya Kilimo)

Naibu Waziri wa Kilimo Mhe Innocent Bashungwa (Mb) akizungumza kwenye mkutano wa hadhara mbele ya Makamu wa Rais wa Jamhuri ya Muungano wa Tanzania Mhe Mama Samia Suluhu Hassan ambaye yupo mkoani Shinyanga kwa ajili ya ziara ya kikazi, Tarehe 27 Februari 2019.

Naibu Waziri wa Kilimo Mhe Innocent Bashungwa (Mb) akikagua maabara ya Pamba wakati alipotembelea Ofisi za Bodi ya Pamba Mkoani Shinyanga, Tarehe 27 Februari 2019.

Makamu wa Rais wa Jamhuri ya Muungano wa Tanzania Mhe Mama Samia Suluhu Hassan akikagua maabara ya Pamba wakati alipotembelea Ofisi za Bodi ya Pamba  akiwa katika ziara ya kikazi Mkoani Shinyanga, Tarehe 27 Februari 2019.

Na Mathias Canal, Wizara ya Kilimo-Shinyanga

Naibu waziri wa Kilimo ameiagiza Tume ya Maendeleo ya Ushirika kusimamia zoezi la ulipaji wa madai ya watumishi wa Chama Kikuu cha Ushirika Shinyanga (SHIRECU).

Mhe Bashungwa ameyasema hayo leo tarehe 27 Februari 2019 kwenye mkutano wa hadhara mbele ya Makamu wa Rais wa Jamhuri ya Muungano wa Tanzania Mhe Mama Samia Suluhu Hassan wakati akijibu swali la Mbunge wa Jimbo la Shinyanga Mjini Mhe Steven Masele aliyetaka kufahamu watumishi hao watalipwa lini fedha zao za madai.

Katika agizo hilo ameitaka Tume ya Maendeleo ya Ushirika nchini kuhakikisha kuwa malipo hayo yanalipwa haraka iwezekanavyo kwani tayari tume hiyo ilikwisha elekezwa na Waziri Mkuu Mhe Kassim Majaliwa kuthaminisha vyuma chakavu vya SHIRECU ili kuwalipa haraka watumishi hao.

Bashungwa aliongeza kuwa Adhma ya serikali ya awamu ya Tano inayoongozwa na Mhe Rais Dkt John Pombe Magufuli ni kuleta mageuzi ya kiuchumi na kuwafanya wananchi kuwa na maisha bora kupitia kilimo ambacho kinafungamanishwa na viwanda ambapo mkakati huo utaimarika kwa kupitia Ushirika kwani wakulima wanapojiunga na ushirika serikali ni rahisi kuwahudumia kwa kuwa itakuwa inawatambua.

Alisema kupitia dhana ya ushirika itakuwa ni njia rahisi kuwapatia wakulima pembejeo kwa wakati na za bei nafuu huku mara baada ya kuvuna mazao yao serikali itawarahisishia upatikanaji wa masoko.

Kuhusu zao la Pamba Naibu Waziri Bashungwa amesema kuwa katika kuongeza thamani ya zao hilo na kufungamanisha kilimo hicho na viwanda wananchi wengi wamelima Pamba kwa kiasi kikubwa jambo litakalowapatia fedha nyingi na kuinua uchumi wao.

Alisema kuwa katika zao la Pamba kumekuwa na changamoto mbalimbali za upatikanaji wa Viuatililifu lakini serikali imeendelea na mkakati wa kwenda moja kwa moja kwenye viwanda vinavyozalisha Viuatilifu nje ya nchi ili kuondokana na mfumo wa madalali.

“Kwa kuwa utafiti unaonyesha kuwa viwanda vingi vya kutengeneza viuatilifu vipo China hivyo nasi kama wizara kuaznia msimu unaokuja wa kilimo wa mwaka 2019/2020 tutaenda wenyewe kunua viuatilifu na kuhakikisha tunavileta nchini na kufanya hivyo tutakuwa tumefuta kabisa changamoto hiyo” Alikaririwa Mhe Bashungwa na kuongeza kuwa

Endapo serikali itaenda yenyewe kununua viuatilifu itarahisisha makali ya bei kwani itakuwa inanunua mzigo mkubwa hivyo ni rahisi kupunguziwa bei.

MWISHO